كود سبور//

كشفت جريدة “أس” الإسبانية أن فريق ديبورتيفو لاكورونا قرر يخرّج التيران ديالو من ملف تنظيم مونديال 2030، المشترك بين المغرب وإسبانيا والبرتغال، وهو ثاني تيران إسباني كاينسحب بعد ملعب مالقا.

وحسب الجريدة الإسبانية فعدد التيرانات الإسبانية فملف كاس العالم 2030 نقص من 11 إلى 9 ملاعب، وهذا الشي حيث الأندية بجوج ومدينة مالقا اتفقو على إصلاح التيرانات ولكن بدون استجابة لشروط ومعايير إقمة المونديال، وقرارهم جا حيث ما قادرينش على تحمل تكاليف إصلاحات دفتر تحملات الفيفا.

هذا الشي كايلعب لمصلحة المغرب، لللي تقدم بـ6 الملاعب بمعايير عالمية، وغادي يقدر يتزاد له عدد الماتشات د كأس العالم 2030، اللي غادي يستضفها فالتيرانات المغربية، وهذا حتى هو مؤشر مهم خصوصا وأن المغرب منافس مع إسبانيا على استضافة نهائي المونديال، أما البرتغال داخلين غير بـ3 التيرانات.

ومن دابا كايبان أن الملاعب المغربية احسن من ناحية الاستعدادا من التيرانات الإسبانية، اللي بدات كاتنسحب ومن 11 تيران بقات غير 9 الملاعب، مع العلم أن المغرب منافس مع الصبليون على احتضان النهائي بملعب الحسن الثاني بالدار البيضاء اللي غادي يكون أكبر ملعب فالعالم بطاقة استعابية كثر من 114 ألف متفرج وبمواصفات عالمية فيها شروط الفيفا، أما إسبانيا داخلين بتيران سانتياگو برنابيو فمدريد وكامب نو فبرشلونة، وسط جدل كبير على تلبية هاد 2 تيرانات لمعايير الفيفا.