كود الرباط//

واخا المغرب نجح فتطوير النقل السككي بفضل البراق، المشروع ما وقفش هنا، حسب عرض لوزير النقل واللوجستيك، فراه كاين مخطط طموح كيهم توسعة الشبكة باش توصل الخدمة المدن الرئيسية بحال أكادير ومراكش.

هاد المشروع كيتعلق بخط جديد غادي يربط بين كازا ومراكش وصولاً لأكادير، وهاد الخط فيه خط تيجيفي يمتد على طول 240 كيلومتر بين أكادير ومراكش، استثمار كيتقدر بـ50 مليار درهم.

كلشي عارف أن أكادير منطقة استراتيجية، سواء من حيث السياحة أو التجارة. الربط بين الشمال والجنوب عبر البراق غادي يخلق دينامية جديدة فالحركة الاقتصادية، وغادي يكون حل للعديد من المشاكل ديال التنقل اللي كيواجهوها الناس، خصوصاً مع بعد المسافة بين أكادير وباقي المدن الكبرى بحال الرباط وكازا.

الوثيقة ديال عرض الوزير، كتعرض الأرقام والمراحل ديال المشروع بحيث أن 48٪ من الدراسات التقنية راه تكملات، وهادي خطوة كبيرة كتأكد الجدية ديال المشروع. كيبقى السؤال: فوقاش غادي يخرج هاد المشروع للوجود؟ واش غادي يكون بنفس السرعة اللي عرفناها مع الخط الرباط-طنجة؟