احمد الطيب كود الرباط//

اللي واقع فحزب الاستقلال، ما عمرو وقع لشي حزب مشارك فالحكومة، حزب خدم نصف الولاية الحكومية خارج القوانين الجاري بها العمل، تعطل بزاف يدير مؤتمر، وملي دارو وقع فالبلوكاج.

خلفيات البلوكاج واضحة، هو أن تيار مبغاش يتفك من الامتيازات والصفقات لي كان كيشدها طوال مشاركة حزب الاستقلال فالحكومة، صفقات من جميع الاتجاهات من أبسطها للي بون دوكوموند لصفقات التواصل وزيد عليها داكشي لي كبير.

طبعا هاد التيار معروف لمن تابع ولمن موالي، باغي حزب الاستقلال يردو حزب عائلات، هو تيار العائلات الفاسية، لي خداو من علال الفاسي قواعد ومبادئ المحافظة (التزمت الفكري طبعا، وكذلك خداو من تريكتو قوالب السياسة، شي يناضل وشي يستفد، كيف وقع فالاستقلال، المقاومة ناضلت وفاسا استفدو.

وملي التحقو أبناء الجنوب بهاد الحزب، تخلق نوع من الصراع ولكن ما خرج من دائرة صراع الأعيان وللي طبعا هو صراع كيستفد منو تيار فاس ديما، فالمقابل مثلا تيار الصحراء كان ديما مهمش على مستوى الاستوزار ونيل الصفقات العمومية، حتى جات مرحلة شباط للي كان فيها حزب الاستقلال حاضر فالنقاش العمومي بقوة وكانو لقاءات وكان شباط حاضر فالإعلام عكس نزار بركة.

طبعا فمرحلة شباط، للي عتق حزب الاستقلال هو تيار حمدي ولد الرشيد، وشفنا شنو وقع فمؤتمر الحزب سنة 2017 من حروب وصلت للمضاربة بالطباسل، ورغم هاد تيار مخداو والو مقابل تيار فاس لي شاد تقريبا أهم المناصب.

جات مرحلة انتخابات 2021 نزار بركة، للي طلع على اكتاف تيار الصحراء، وتبورد جاب وكالة تواصل ديال فرنساوي خدم فالسوشل ميديا وداير حملة لحزبو، ومورها طلق وعود كلها زائفة لم يطبق منها أي شيء، بدءا بوعد ترسيم أساتذة التعاقد لي رداتهم الحكومة موظفين جهويين وبستين كشيفة دارات ليها صياغة باش يكونو فالنظام الأساسي لموظفي التربية الوطنية، ثم تسقيف أسعار المحروقات للي هو أصلا مطلب غبي اقتصاديا لأنه في المغرب كاين حرية السوق، وغير من الشعارات الانتخابوية.

موراها صعود بركة، جا تقسيم الكعكة ديال المناصب، طلعو وزراء حتى واحد معرفهم، ولكن فالبرلمان طلع اسم معروف النعم ميارة، واحد من رجالات الصحراء، لي خدا منصب رئيس مجلس المستشارين، ورغم ذاك حاربو تيار فاس عن طريق رئيس فريق الاستقلال بمجلس المستشارين عبد السلام اللبار، وهو أحد وجوه السكة القديمة للي مزال مبغاهش يتفك من المناصب والقيام بالوساطات للي عليها أسئلة كثيرة.

دابا، حسب مصادر حزبية، الاستقلال بدون لجنة تنفيذية، لسبب بسيط، صحاب وتيار فاس مبغاوش يتنازلو اكثر لتيار الصحراء، وباش يحاصرو هاد التيار مشاو تحالفو مع فلاح كبير فسوس وهو عبد الصمد قيوح وللي حتى هو السكة القديمة حلمو يرجع للاستوزار، ويلا رجع وزير غاتكون فضيحة كبيرة، واحد استفد كثيرا من الدعم العمومي للفلاحة والحصيلة فاشلة لأن الفرشة المائية استنزفت وفهاد الحالة خص تحريك المحاسبة بدل يتم تزكيتو ويطلع نائب رئيس مجلس النواب.

تجربة ديال رئيس مجلس المستشارين من الصحراء، مهمة بزاف، ونجح فيها ميارة حاليا، بالدبلوماسية لي دار لعدد من الدول فأمريكا اللاثينية ودوره في برلمانات البحر الأبيض المتوسط. يلا كان شي استوزار يتعطا لأبناء الصحراء، على الأقل ماشي بحال السكة القديمة لي فحزب الاستقلال لي كيدخلو حتى عائلتهم وأبنائهم فالدواوين بحال رئيس الفريق الاستقلالي السابق نور الدين مضيان لي مدخل ولد خوه مستشار لنزار بركة. غريب واحد مدوز عشرين عام فسابقة فمنصب رئيس الفريق النيابي يحط ولد خوه فديوان بركة. هنا بركة طاح من عين عدد من مناضلي الاستقلال.

نزار بركة مدور به قيادات دايرين فحال الإسلاميين، يلا مخداوش مناصب يبقاو يدوخو على الحزب بالمبادئ والديمقراطية والمحافظة. بركة لي دار فضيحة كبيرة فمدونة الأسرة فاش خلا مقترح تزويج القاصرات فسن 15 سنة كحد أدنى للزواج يدوز، غير على هادي خاص يتم طرد القيادات لي كانت وراء هاد المذكرة المتخلفة لي تعطات للجنة الملكية المكلفة بمراجعة مدونة الأسرة. هادو مكيشرفوش مغرب المونديال.