كود -وكالات//

رجعات واحد لاجونص صغيرة ديال أسفار متخصصة فتنظيم رحلات الحج فباريس مسرح ديال جريمة هزّات الرأي العام الفرنساوي، بعدما لقات جثة ديال سيدة خمسينية مخبّية فبلاكار الضحية، ياسمين زكية بنهربي (57 عام) من أصول جزائرية، كانت غبرات نهار 23 أبريل، قبل ما تلقا مقتولة مورا 4 أيام وسط مقر خدمتها.

المعطيات الأولية كتفيد أن السيدة تعرّضات لاعتداء جسدي خايب قبل ما يتم خنقها حتى الموت، ومن بعد تخبّات الجثة فـ”ساك ديال الزبل” وسط بلاكار تحت الدروج، الغريب فالقضية هو أن المشتبه فيه الرئيسي، هو الشاب لي خدام معها إبراهيم ب. (27 عام) أصلو تونسي، ولي كان من بين الناس اللي كيقلبو عليها، وحتّى تعاون مع البوليس ودار جولة وسط الوكالة، بلا ما يبان عليه أي ستريس، وخا أن الجثة كانت قريبة منو.

ولكن مع التحقيق، الفرقة الجنائية لاحظات تناقضات فتصريحات الشاب، فالأول نفى التهم، قبل ما يعترف بالجريمة، وبرر الفعل ديالو بان الضحية مبغاتش تسلفو من صالير باش يعاون عائلتو فتونس.

المتهم، اللي ما عندوش سوابق قضائية، مشا الاعتقال الاحتياطي، بينما تكمل التحقيقات التقييمات النفسية اللي غادي تحاول تفهم الخلفيات الحقيقية لهاد الجريمة.