كود سبور//

رجع نصير مزراوي ياخد الرسمية ديالو مع بايرن ميونخ الالماني، بعدما بقى كالس فالماتشات الاخيرة للفريق فالاحتياط.

وحدد الالماني توماس توخيل مدرب بايرن ميونخ تشكيلة اللاعبين اللي غيدخلو أساسيين فماتش الفريق الاحمر ضد بوخوم، اليوم السبت فالبطولة الالمانية، وكاين معهم الظهير الايمن المغربي نصير مزراوي.

وكان توماس توخيل مدرب بايرن ميونخ قال فأخر تصريح له قبل ماتش اليوم، ان نصير مزراوي خاصو يضارب على بلاصتو باش يلعب تيتيلور، وهذا الكلام ما عجبش بزاف من المتتبعين وخصوصا الجمهور المغربي، حيث ولا كيبان لهم ان المدرب الالماني بحالا كيشد الزكير مع اللاعبين المغاربة، خصوصا وانه ما كانش كيلعب حكيم زياش ملي كان كيدربو فتشيلسي النكليزي.