عمـر المزيـن – كود//

علمت “كود” أن مصالح الشرطة القضائية بمدينة مراكش، أوقفت مساء أمس الثلاثاء، صحافية من كازا وموظفة بوزارة التجهيز، للاشتباه في تورطهما في قضية تتعلق بالابتزاز والارتشاء.

وحسب المعلومات التي حصلت عليها “كود”، من مصادر مطلعة، فإن توقيف هاد الصحافية اللي خدامة فشي موقع إلكتروني جاء على خلفية شكاية تقدمت بها النائبة التاسعة لرئيس مجلس جهة مراكش آسفي.

هاد المستشارة المنتمية لحزب الاتحاد الدستوري، كيف قالت مصادر “كود”، تعرضت لحملات تشهير على هاد الموقع الإلكتروني للي رفض المثول أمام الشرطة القضائية للاستماع إليه رغم استدعائه، مشيرة إلى أن هاد الصحافية تشدات مع الموظفة اللي لعبات دور الوسيطة فشي مقهى معروفة بمنطقة “جليز”.

هاد الصحافية جات لمراكش مع الوسيطة باش ياخدو فلوس صحيحة بلغت قيمتها 13 مليون سنتيم، وحصلوا متلبسات بجزء من هاد المبلغ المالي المتفق عليه. دبا تدارو فالحراسة النظرية بتعليمات من النيابة العامة وغدا الخميس سيتم تقديمهن أمام وكيل الملك لدى المحكمة الابتدائية.

الصحافية مني حصلات ادعت باللي لفلوس اللي خداتها من هاد السيدة تتعلق بصفقة إشارة بينها وبين إدارة الموقع اللي هي خدامة فيه. نساينو كلمة القضاء اللي غادي يقول شنو وقع بالضبط.