كود تطوان//

عرفت مدينة تطوان، نهار اليوم السبت، عملية أمنية شدات الانتباه قرب مستشفى سانية الرمل، بعدما هبطو عناصر البوليس على واحد الطاكسي الكبير لي كان واقف فداك المكان فظروف مشبوهة.

و وفق مصادر محلية، البوليس لقاو داخل الطاكسي جوج ديال الشباب ف حالة سكر طافح، وحتى السائق نفسو كان سكران، رغم أنه حاما لرخصة الثقة وخصو يكون قدوة فاحترام القانون وحماية المواطنين.

العناصر الأمنية نزلات الركاب والسائق، ودارت عليهم التفتيش، لي تبيّن من خلالو أنه كان عندهم “الغبرة”، الشي لي زاد فأسباب التوقيف. من بعد تم اقتياد الشابين والشيفور لمخفر الشرطة من أجل تعميق البحث وتحديد ملابسات هاد السلوك الإجرامي.

أما سيارة الأجرة، فتم جرها وإرسالها للفوريان، فانتظار اتخاذ الإجراءات القانونية المناسبة، خصوصا أن استغلال طاكسي مرخص فأنشطة غير قانونية كيعتابر خرق خطير للقوانين المنظمة للمهنة وللسلامة العامة.

هاد العملية كتجي فإطار المجهودات اليومية لي كيدير الجهاز الأمني بتطوان باش يواجه أي ممارسات مخالفة للقانون، خصوصا اللي كتمس بالنظام العام وسلامة المواطنين.
وفي رواية أخرى لهاد الحادث قالت مصادر (كود) أن ركاب الطاكسي والشيفور صبحوا سكرانين، ومرونين الدنيا حدا سبيطار “سانية الرمل” على الصبح وكانوا كا يديرو شي تصرفات غريبة وكايهضرو بكلام نابي قدام الناس ..
والبوليسي للي كان في الحراسة فسبيطار شاف تصرفات ديالهم الغريبة
وشك فيهم وهو يتصل بالدعم و حضرو عناصر الأمن وقامو بتوقيفهم، و منين فتشو السائق و اللي كانو معاه لقاو عندهم السليسيون وأنواع أخرى من المخدرات.