كود سبور//

من المنتظر توحد العصبة الوطنية لكرة القدم الاحترافية مواعيد ماتشات ما تبقى من دورات بطولة القسم الوطني الأول، لضمان تكافؤ الفرص بين الفرق المتنافسة.

ومازال فالبطولة الاحترافية 3 ديال الدورات، وكتعرف تنافس 2 أندية على اللقب هما الجيش الملكي المتصدر، والرجاء الرياضي المطارد ديالو، وبالتالي فالعصبة ملزمة باش تدير لهم توقيت واحد فالماتشات ديالهم اللي باقيين، مع العلم أن الفراقي بجوج ضمنو التأهل لدوري أبطال أفريقيا كيفما كانت هوية المتوج فيهم بلقب البطولة.

والمنافسة كاينة ايضا بالنسبة للاندية اللي لاعبين على المركز الثالث المؤهل إلى كاس الكونفدرالية الافريقية، والهضرة هنا على نهضة بركان والوداد الرياضي والفتح الرباطي وبنسبة اقل أولمبيك اسفي.

أما بخصوص الأندية اللي لاعبين على الطياح راه شاعلة بيناتهم، وكيتعلق الأمر بيوسفية برشيد، وشباب المحمدية، وشباب السوالم، واتحاد طنجة، وحتى المغرب الفاسي، وحسنية أكادير.