كود سبور//

كايواجه مشروع الوداد الرياضي استعدادا لكاس العالم للاندية “المريكان2025″، مع المنافسة على لقبي البطولة الاحترافية وكاس العرش خلال هذا الموسم، مشكل انسجام اللاعبين واللي مؤثر عليه التوقف الدولي، فالوقت اللي الفريق كايفضل يلعب دوري التميز بلاعبين اغلبهم شباب، خصوصا وان القانون كايفرض يكونو 6 لاعبين عندهم اقل من 23 عام رسميين فالفريق.

وخلال التوقف الدولي الجاي كاتعرف صفوف الوداد الرياضي غياب 8 اللاعبين مهمين بالنسبة للمدرب الجنوب إفريقي رولاني موكوينا، وهذا الشي من بين المشاكل اللي تقدر تهدد وتؤثر سلبا على البروجي ديالو فبناء فريق صلب وموحد خصوصا وانه يعتمد على طريقة لعب أساسها الانسجام والبناء من الخلف ثم وسط التيران وصولا إلى الهجوم، الشي اللي كايعني انه محتاج لكل فترة راحة يكون فيها الوداد ما لاعبش باش يجمع اللاعبين فالتداريب ويزيد يقوي الفريق وغياب اي لاعب يقدر يكون نقطة ضعف بالنسبة له.

وبالنسبة لغيابات الوداد الرياضي فالتوقف الدولي المقبل، فالثمانية لاعبين اللي غايمشيو للمنتخبات ديالهم هم جمال حركاس اللي عيط له وليد الركراكي للمنتخب الوطني المغربي الاول، والموريتاني بونا عمر اللي عيطو له لمنتخب موريتانيا، و6 اللاعبين عيط لهم طارق السكتيوي للمنتخب المحلي هم أسامة الزمراوي، ومهدي موباريك، ووليد ناسيك، ومحمد مفيد، نسيم الشادلي، وطه مفيد.

وصبح التوقف الدولي كايشكل مخاوف كبيرة عند مكونات الوداد الرياضي كل ما قرب، والوداديين كايتشكاو بزاف من هذا الشي، خصوصا بعد إعلان طارق السكتيوي استدعاء 6 لاعبين كاملين إلى المنتخب المحلي.