عن الصباح – كود الرباط//

عدد من المصادر كتهضر اليوم على التعديل الحكومي المرتقب، ممكن يكون هاد الأسبوع، وغالبا يلا مدارش مغايكون عليه حتى حديث حتى العام الجاي. مصادر “كود” توقعت يكون التعديل هاد الأسبوع.

وفي سياق متصل قال جورنال “الصباح” لعدد يومه الاثنين 14 اكتوبر 2024 بلي هاد التعديل الحكومي القريب غايشمل 6 وزراء، منهم 3 وزيرات. وقالت الصباح، نقلا عن مقرب من فاطمة الزهراء المنصوري، وزير الاسكان واعداد التراب الوطني، للي غابت عن جلسة افتتاح البرلمان بسبب اصابتها بـ”كوفيد”، بلي هاد التعديل الحكومي بات ملحا والحكومة محتاجة لنفس جديد. إلى ذلك، تشير التوقعات بأن عدد من الوزراء خايفين يطرا ليهم كيف ما طرا لرئيس مجلس المستشارين لي طار بسرعة البرق وبلا خبارو الا فالساعات القليلة قبل من انتخاب رئيس مجلس المستشارين. وانهم ممكن يطيرو فأي وقت. وفي المقابل كاينين وزراء محظوظين، خصوصا مع الحملة لي كيتعرضو ليها من لوبيات وصحاب مصالح، غير حيث باغي يطور القطاع لي شاد ويمكن المملكة من السيادة الطبية والصحية، بحال وزير التعليم العالي عبد اللطيف ميراوي، لي تحدا لوبيات باش يدوز قرار تقليص سنوات الدراسة من 7 سنوات إلى 6 سنوات.

وزير فالحكومة هضر مع “كود” وقال بلي هاد التعديل الحكومي كنسمعو به غير فالصحافة وكلام كيدور بين بعض الوزراء في حين إلى آخر. وبلي حتى واحد معارفش وقتاش وكيفاش غايكون التعديل الحكومي. مصدر آخر من الاغلبية شدد بلي حتى لي كيقول هاد الوزير غايطير ولاخر غايبقا فراه غير كيقمر لأن كولشي عارف شكون للي عندو الصلاحيات الدستورية القانونية للقيام بالتعديل.

تفاصيل اكثر فجريدة “الصباح” وموقعها على الانترنيت