كود الرباط//
توصلت “گود” بتوضيح من شركة سيتي باص، يتعلق بمقال نشرناه يوم 15 شتنبر الجاري، بعنوان “ريع التدبير المفوض ديال الطوبيسات.. كيفاش شركة متورطة فخروقات وعندها ملفات فالقضاء باقا مستمرة فالخروقات وكتحدا القانون: شكون كيحميها ضد رؤساء جماعات للي عياو من التخلويض ديالها ومقدروش يوقفوها”.
فهاد التوضيح كتقول الشركة بلي لي نشرناه غير كذوب وإشاعات ومعطيات غير صحيحة ووو. سواء فيما يتعلق بتقرير المجلس الجهوي للحسابات بفاس أو تقارير أخرى، وكذلك الشهادات الموثقة بالصوت والصورة، وتصريحات عمدة فاس ومنتخبي جماعة تطوان.
الشركة نفات كولشي وقالت بلي غاتمشي للقضاء. من حقها طبعا.
رد گود:
باختصار لي نشرناه كله عبارة عن معطيات نشرها تقرير المجلس الأعلى للحسابات، وبناءا على تصريحات موثقة (عمدة فاس، عمال الشركة وو…)، وفيديوهات، وتقارير صحفية سابقة (ليكونميست، الصباح..).
إضافة إلى أن رئيسة المجلس الأعلى للحسابات زينب العدوي قالت يوم الثلاثاء 2 ماي 2023، في جلسة عمومية مشتركة بين مجلس النواب والمستشارين، إن الوكيل العام للملك لدى المجلس الأعلى للحسابات قد أحال، في الفترة ما بين بداية سنة 2021 وحتى 28 أبريل 2023، 18 ملفاً يخص 14 جماعة ترابية، ومؤسستين عموميتين تابعتين لقطاع التعليم العالي، وشركة للتنمية المحلية بجهة الرباط القنيطرة، وشركة مفوض لها تدبير النقل الحضري بجهة فاس مكناس، على وكيل الملك لدى محكمة النقض.
بذلك الشركة مجاوبتش على إحالة “خروقاتها” على وكيل الملك لدى محكمة النقض. بزاف ديال الشبهات فيها تحقيقات قضائية سواء في فاس وتطوان ووجدة.
وبخصوص التهرب الضريبي، فراه ليكونوميست لي نشراتو وحنا غير قلنا نقلا عن ليكونوميست. علاش الشركة مادراتش رد على ليكونونيمست. ومدارتش بيان ضد مجلس العدوي .
