ݣود ـ بني ملال//

خطوة كبيرة ومهمة فطريق تطوير الرواج فجهة بني ملال ـ خنيفرة، حيث المكتب الوطني للمطارات قرّر يوسّع مطار بني ملال باش يكون جاهز يستقبل الرحلات الجديدة اللي غادي تربط المدينة مع دول أوروبا.

هاد المشروع داخل فالاستراتيجية الوطنية لتطوير البنية التحتية للمطارات ورفع معايير السلامة والجودة، وغادي يشمل أشغال مهمة بحال بناء سور جديد للمطار بطول 6.2 كيلومتر باش يحمي المحيط ديالو، وطريق مراقبة دائرية على طول 7.2 كيلومتر باش تسهّل عمليات التفتيش والتدخل، عاد توسيع باركينغ السيارات على مساحة 3500 متر مربع باش تكون الراحة والولوج ساهل للمسافرين.

المشروع غادي يكلّف تقريبا 15.5 مليون درهم، وهدا دليل على التزام المكتب الوطني للمطارات بمواصلة تحديث القطاع الجوي وتحسين الخدمات فكل مطارات المملكة.

هاد الخطوة غادي تكون مهمة بزاف حتى بالنسبة للجالية المغربية اللي من جهة بني ملال–خنيفرة والمقيمة فدول أوروبا، خصوصاً ففرنسا، اسبانيا، وطاليان. هاد الجالية كتعيش صعوبات كبيرة فالسفر للمنطقة، حيث كيبقاو مضطرين يسافرو عبر مطارات أخرى بعيدة بحال الدار البيضاء أو مراكش خصوصا مع قلة الخطوط الجوية، وهاد الشي كيزيد عليهم فالمصاريف والمحاين.

ومع التوسعة ديال مطار بني ملال وفتح الخطوط الجوية الجديدة، غادي تولي الرحلات ساهلة ومريحة، وغادي يكون المطار واحد القنطرة مباشر بين الجالية وبلادها، خصوصاً فمواسم الصيف والعطل اللي كيرجعو فيها بزاف منهم باش يزورو عائلاتهم ويساهمو فتنشيط الاقتصاد المحلي.