گود سبور//

كشف الإعلام الفرنسي أن النجم المغربي أشرف حكيمي لاعب باريس سان جرمان الفرنسي، محمّر باش يلعب كأس أفريقيا “المغرب 2025” مع المنتخب الوطني المغربي، واخا الإصابة اللي خرجت له من الجنب الثلاثاء الماضي بعدما وعتو الكولومبي لويس دياز لاعب بايرن ميونخ فـ ماتش الفريقين ضمن دوري أبطال أوروبا، وأن اللاعب ناوي يدير كل جهدو باش يبدا كوب دافريك من ماتش الافتتاح ضد جزر القمر.

وحسب موقع “فوت ميركاتو” الفرنسي، أشرف حكيمي والمحيط ديالو اللي كانو كايتسناو شي سيناريو خايب على الإصابة ديالو قبل إجراء الفحوصات الطبية، ارتاحو ملي عرفو نتائج التشخيص الطبي، وبالنسبة لهم المشاركة ديالو فكأس إفريقيا ماشي هدف مستحيل، ولكن بالعكس راه ممكنة، واخا من المتوقع ما يلعبش ما بين 6 حتى 8 السيمانات، وأنه رفض يدير عملية جراحية باش يحافظ على فرص المشاركة مع المنتخب المغربي فكأس إفريقيا، وباغي يرجّع اللياقة البدنية ديالو دغيا.

وكمل نفس المصدر، وقال إن المقربين من أشرف حكيمي كايتوقعو أن اللاعب غايرجع يلعب مع افتتاح كاس إفريقيا يوم 21 ديسمبر الجاي، أي بعد 6 السيمانات من دابا وأن هذا الشي ممكن وماشي بعيد، وان حكيمي ما باغيش يزگل كأس إفريقيا وهضر مع الطاقم التقني للمنتخب الوطني المغربي بقيادة وليد الركراكي، واللاعب ما باغيش يضيع شي فرصة اللي كاتقوي المشاركة ديالو فـ كوب دافريك، وأنه داير المشاركة مع المنتخب المغربي فـ ماتش جزر القمر ضمن افتتاح كأس إفريقيا كهدف دابا باش يبرى دغيا.