كود الرباط//

مقربلة ف الصفحات وفالواتساب والتكتوك، المنصات الأكثر استعمالا وسط المغاربة، الأميون والمتعلمون، الأسر والأفراد، الهضرة فالقهاوي وفالطوبيس والطرام والطاكسيات، كلها على مدونة الأسرة.

التفسيرات من هنا ولهيه، السلفيون بغبائهم المعروف وجهلهم بالقانون ومقاصد الشريعة حتى هوما ناضو دارو مدونة خاصة بهم ورفضو هاد التعديلات الجديدة.

فهاد السياق ديال الجهل والتفسيرات المغلوطة، غابت الحكومة عن التواصل، مقدراتش تفعل توجيهات سيدنا ليها، لي قاليهم نوضو وكفضو على ذراعكم وتواصلو مع المواطنين وشرحو ليهم المدونة.

من غير وزير العدل ومستشاره أبو حفص، مكاينش تواصل حكومي فهاد المدونة. الناطق الرسمي باسم الحكومة مصطفى بايطاس، ضعف ومعندوش “كفاءة التواصل” ولا عارف قواعد التواصل الصحفي، حتى أن ندواته الصحفية الأسبوعية كتلقا مقاطعة أغلب الصحافيين (المحليين والدوليين).

واش الحكومة كتسنا عاود فوزي لقجع يخرج ويشرح ويملح، حيث الوحيد فالحكومة لي كيبان كيتواصل بطريقة جيدة. تلقاه فقانون المالية يدافع ويشرح ويوضح ويقنع. هاد الجوكير الوحيد لي بقا ويمكن الحل الوحيد لي عند الحكومة باش تخرجو ويدافع على المدونة.

أما واحد الوزير المكلف بقطاع الاتصال، فراه عندو كولشي “لعب” بحال الألعاب الإلكترونية، كولشي عندو مارشيات ومعارض “فارغة من المحتوى”، الفن عندو هو القاعة والكرسي بشحال تقام وشمن شركة تاخد مارشي لبناء مسرح أو سينما. وهكذا فكولشي. أما قطاع الاتصال هو المهمش فهاد الوزارة. غائب تماما.

كون هاد المدونة فيها “الحبة” و”عمر” والمارشيات، تلقى هاد وزير الثقافة والتواصل كيطير بجيشو من المستشارين وصحابو فشركات التواصل لي كيخدو منو مارشيات، ويديرو لقاءات ووو. المهم الحبة مكايناش فهاد الورش الملكي.

ماشي غير مدونة الأسرة لي كان فيها تواصل ضعيف، حتى بلاغ للي صدراتو المديرية العامة للضرائب حول التسوية الطوعية للوضعية الجبائية للأشخاص الذاتيين ويخلصو 5 فالمائة بلا ما يكشفو على مصدر أموالهم وأرباحهم. كان تواصل ضعيف.

ناس تخلعات ومعارفينش كيفاش كلهم توصلوا برسائل من لأبناك كتخبرهم بضرورة تسوية الوضعية قبل ما يسالي العام. ولكن لا تواصل ولا شرح شكون الفئات المعنية. هادشي حيث عندنا واحد ناطق رسمي “غير ناطق” ولا يعرف كيف ينطق ومتى ينطق.