كود ـ سلا//

سكان حي الروسطال فسلا دوزو ليلة بيضا ما شافو فيها نعاس وأكثر من ذلك كانت كحلة بالمشاكل وبالفهامة الخاوية وتخراج العينين ديال شي عمال ديال شركة المناطق الخضرا اللي متعاقدة مع جماعة سلا.

هاذ الشي وقع ليلة الجمعة السبت والسكان والحي كامل جاتهم صدمة وهو ما كيطلو من الشراجم كيلقاو عمال النظافة كيقطعو ويشذبو أشجار النخيل وهاذ الخدمة من المفروض دار بنهار وبدون أي إشكال خصوصا أن الحي سكني وما فيه حتا شي نشاط أو صعوبات كتفرض دار هاذ الأشغال ف الليل.

وحسب مستخدمي الشركة فالأشغال اللي انطلقات مع الوحدة ديال الليل واستمرات حتا لـ 4 ديال الصباح، عادية وكدار بأمر من مصالح الجماعة، ومسوقهمش فالسكان واخا ديك الخدمة مزعجة (صور وفيديو)

السكان المتضررين من هاذ الخدمة لي ما يتقبلهاش العقل ملي احتجو حتا واحد مداها فيهم، وبقاو الأغلبية منهم سهرانين حتا الصباح خصوصا أن صوت موطور قطع الأشجار من النوع التقليدي اللي كيخدم بالمازوط كيدير صوت مزعج بزاف.

السكان ديال الحي قرروا يحطوا شكاية عند العمدة وعند العامل باش هاذ الإزعاج والضرر ميتكررش.