محمد سقراط- كود

—
وفجأة أصبح الحدث هو مراكش والذهاب الى مراكش وحقوق الإنسان في مراكش، وفنادق الخمس نجوم في مراكش، وصور الحقوقيين في مراكش، ممتزجا هذا الحدث مع غيس الفيضانات التي يشهدها المغرب طفى على السطح، برائحة موتى فاجعة كلميم، طغى، وما كان ينقص المنتدى ليصبح خبرا عالميا هو مشاركة ابتسام تسكت فيه، وحبذا لو غنت وتدللت وتغنجت وفتنت وصانت حقوق الإنسان.

 
وهاجر جميع الناشطين الحقوقيين الى مراكش، لمدينة النشاط ديال بصح، عوض بقائهم في الرباط الكئيبة، وهادي كانت خطة من طرف النظام المخزني الفاشي، بلعاني دارو هاد المنتدى فمراكش كإمتحان لصلابة مبادئ المناضلين الأشاوس،وهادي خطة قديمة كيمارسها النظام من شراء لذمم المناضلين(شحال هادي ماسمعت هاد الخطاب)، وحقا كان حجهم غفيرا، مشاو ليه المدعوين والغير مدعوين، مشاو ليه المؤيدين والمعارضين، وهادي فحد ذاتها سابقة فالعالم ربما،

أنه حتى فالمجال الحقوقي عندنا مؤيدين ومعارضين، وأن فمنتدى لحقوق الإنسان، كاينين ناس خريين كيديرو هادشي ديال حقوق الإنسان وضد المنتدى وتظاهرو ضدو، هادشي جاني بحال الى موالين لحوانت الصغار دارو مظاهرة ضد مرجان فباب مرجان حيث كيهدد وجودهم، الدولة حيث هي مولات شي دارت مرجان ديال حقوق الإنسان فمراكش، وحيث المغاربة معروفين باللهطة فراه تكبو كلهم على هاد مرجان ديال حقوق الإنسان كيف ما تكبو السكارى السلاويين نحو كارفور نهار تفتح، وطبعا الحوانت الصغيرة ديال حقوق الإنسان حسات بالتهديد حيث بزاف ديال لكلييان دياولهم هربو ليهم نحو الشابيطو لكبير، حيث فيه حقوق الإنسان كثيرة ومستفة مزيان، وبجميع الأحجام، والجودة مضمونة، وكاين حتى المنتوج الإقتصادي ديال حقوق الإنسان داكشي لي كتخصص فيه الجمعية المغربية، غي هو فالشابيطو لكبير مطيحين الثمن، ودايرين العباسية الماكلة ولمباتة فأفخم الفنادق على حساب المنتدى، وهادشي طبعا ميقدروش يديروه موالين لحوانت الحقوقية الصغيرة.

 
ولكن ماشي كاع موالين الحوانت الحقوقية دمادم، ودارو مظاهرة ضد المنتدى، كاين لي فيهم عندو بعد تجاري، مشا للمنتدى كيقلب على حقوق الإنسان لي دايرين عليها الصولد باش يتقدى منها الكثرة، ويبقى يبيعها زايدة ربعة دريال لهادوك لي ممدعوينش للمنتدى، أو بعيد عليهم، أو كيعكزو، مافيهم مايمشيو حتى للشابيطو لكبير، على ود شي حاجة قليلة ديال حقوق الإنسان.

 
والحمد الله حنا بلاد حقوق الإنسان لدرجة أننا نضمنا المنتدى الدولي ديالها، وجا العالم كامل شاف حقوق الإنسان فالمغرب كيدايرة، وجاو الإخوة السعوديين حتى هوما يشوفو حقوق الإنسان عندنا ويشوفو حرية المرأة فالمغرب فين وصلات فروتانا وأوتار وكاري روج وأكتورز، وهادي كانت مبادرة زوينة من الدولة لأنها خرجات حقوق الإنسان من الرباط ومن الحانات الرخيصة هناك، وجابتها لمراكش بلاد البهجة والسرور حيث كلشي سعيد وناشط وواخد حقو، وحيث الوقفات كتدار سلمية مكتساليش بالدم والعصا، بل كتسالي فالمؤوى الصغير والساموفار، وراه كل واحد ورزقو هادشي لي كيقولو البياعة والشراية فأي حاجة، وهادشي لي خاص يقتانعو بيه موالين لحوانت الحقوقية، راه داك الموسم ديال حقوق الإنسان غادي يهز وتادو ويمشي، وغادي يرجعليكم الكليان ديالكم غي رتاحو.