كود سبور//

عبر العداء المغربي محمد تندوفت على الفرحة ديالو حيث صاحبو والمواطن ديالو سفيان البقالي ربح ذهبية أولمبياد باريس2024، فسباق 3000 متر موانع اللي شاركو فالفينال ديالو هما بجوج، وبالرغم من الشكر اللي وجه له البقالي والاعتراف بأنه لعب دور مهم باش فإفشال خطة العدائين الإثيوبيين باش ربح هو السباق، إلا أن تندوفت قال ان البقالي كان قاد بشغالو كان عازم يربح الذهبية وحققها عن جدارة واستحقاق.

وهضر محمد تندرفت بعد نهاية سباق 3000 متر فأولمبياد باريس، وقال فتصريح له: “كانبارك للبطل ديالنا سفيان البقالي على الفوز بالميدالية الذهبية كايستاهلها وكان هو القوي فهاد المسافة وكانبارك له بزاف”.

وكمل العداء المغربي وقال: “حاولت نحتل مرتبة مشرفة وحاولنا نشرفو الرياضة المغربية  وراضيين على هاد النتيجة وكنبغي نبارك لسفيان البقالي على هذا الإنجاز ديالو”.

وزاد تندوفت: “السباق كان تكتيكي وكان شويا ديال التدافع وكان سباق صعيب ولكن كانت النتيجة ايجابية، ما كانش تنسيق وسفيان كان قاد بالشغال ديالو وعازم على انه يحقق الميدالية الذهبية وحققها عن جدارة واستحقاق”.