كود – الرباط//

المفارقة والتناقض ف الشعارات فضح من جديد حزب الاستقلال. الحزب اللي كيترأسو نزار بركة وكيضم وزيرة التضامن والإدماج الاجتماعي والأسرة نعيمة بنيحي وكاتب الدولة عبد الجبار الراشدي، دار مجهود كبير باش يقنع وزارة الداخلية بأن الأشخاص في وضعية إعاقة خاصهم يكونو جزء من العملية الانتخابية.

فالمذكرة اللي رفعها الحزب، شدد على ضرورة تعديل القانون الانتخابي باش يفتح الباب قدام هاد الفئة للتصويت والترشيح وحتى رئاسة مكاتب الاقتراع. الاستقلاليين كيظهرو اليوم وكأنهم كيحاولو يقدمو صورة متقدمة وحداثية، حزب كيآمن بالمشاركة السياسية الشاملة وما كيخليش حتى الإعاقة توقف قدام الحق الديمقراطي.

ولكن في الواقع، خرجات فضيحة من العيار الثقيل. أكثر من 30 ألف طفل في وضعية إعاقة محرومين من منحة الدعم المدرسي اللي هو التزام حكومي منذ سنة 2015.

الجمعيات اللي كتمثل هاد الفئة خرجات ببلاغ ناري اليوم 13 شتنبر 2025 واتهمات فيه وزارة التضامن اللي كتشرف عليها الاستقلالية نعيمة بنيحي بالتقصير وبتجاهل أبسط الحقوق الاجتماعية. الجمعيات دعات لوقفة احتجاجية قدام مقر الوزارة يوم 17 شتنبر الجاري، خطوة اللي كتأكد حجم الغضب وسط الأسر المتضررة.

البلاغ اللي وقعات عليه أكتر من 400 جمعية فضحات شعارات هاد الوزارة. من بين الهيئات الموقعة الاتحاد المغربي للجمعيات العاملة في مجال الإعاقة والجامعة الوطنية للجمعيات العاملة في مجال الإعاقة والمنظمة المغربية لحقوق النساء والأشخاص في وضعية إعاقة والمرصد المغربي للتربية الدامجة.

هاد التنظيمات شددات على أن حرمان الأطفال من المنح كيضرب فحقهم الدستوري في التعليم وكيقصيهم من أبسط شروط العدالة الاجتماعية وكيكشف ازدواجية الخطاب الحكومي بين ما يقال وما يطبق.