گود كازا//

عرف ملف “اسكوبار الصحرا” المعروض امام القضاء وبالضبط بغرفة الجنايات الابتدائية بمحكمة استئناف بالدار البيضاء، واللي متابع فيه سعيد الناصيري الرئيس الأسبق للوداد الرياضي، والقيادي السابق بحزب الأصالة والمعاصرة، مجموعة من التناقضات.

ومن بين ابرز التناقضات اللي بانت فهذا الملف، بعد 2 جلسات من استماع المحكمة لسعيد الناصيري، هو ان عبد الواحد شوقي البرلماني البامي، كايقول انه حضر للناصيري كايعطي للموطن اللبناني لي خدام عند عند الحاج احمد بنبراهيم الملقب بـ “المالي” 100 مليون باش يخرج ليه من فيلا شارع مكة فعام 2016 وانه سكن فيها فعام 2017، و”المالي” كايقول فالتصريحات ديالو ان الفيلا بقات ساكنة فيها الخليلة ديالو حتى لعام 2019، عاد سلمها للناصيري، فالوقت اللي كايقول هذا الاخير ان الفيلا المذكورة شراها من عند مير القاسم وما كمل له الفلوس حتى لعام 2019، وهذا الشي راه اكدو حتى مير القاسم ملي واجهاتو المحكمة بالناصري فالجلسة قبل الاخيرة، وكايقول الناصيري انه دخل سكن فالفيلا فعام 2020، مع جائحة كورونا، وانه فعام 2019 كان مازال ساكن فالبرطمة ديالو فالمعاريف فكازا، وانه عندو ما يثبت ذلك من خلال وراق الما والضو ديال شركة ليديك باش دخل لابونمون للفيلا، وليفاكتير ديال الشركات اللي صلحو له هاد الفيلا، وجبد حتى أسماء الشخصيات اللي كانو كايجيو عندو للبرطمة من 2019 للتحت، واسماء شخصيات كانوا كايجيو عندو للفيلا من 2020 للفوق، ومنهم صحافي ولاعبين د الوداد وسياسين وأعضاء بالبام وبأحزاب اخرى منهم شوقي براسو اللي شاهد ضدو.

وعرف الملف تناقض اخر، يتعلق بتصريح ديال المغنية المغربية لطيفة رأفت طليقة “اسكوبار الصحرا”، اللي فمحضر لها انها حضرت ليهم كايقسمو فلوس الحشيش عندها ف الدار ملي تزوجات بالمالي فـ 26 دجنبر 2013، فالوقت اللي سعيد الناصيري وخلال جلسة الاستماع الثانية اللي كانت البارح الجمعة فالمحكمة، جاب نسخة من كاغيط الزواج ديال لطيفة رأفت مع المالي، وفيها انهم تزوجو حتال 16 يناير 2014، وكاين تناقض آخر، عندو علاقة بطوموبيل من نوع ميرسيديس كايگول المالي فمحضر انها ديالو ولطيفة رأفت كاتقول بلي راجلها المالي عطاها لها كاتسوقها فعام 2013، أما سعيد الناصيري، نفى هذا الشي كامل وقال ان الطوموبيل كانت مِلك ديالو وهي من موديل 2014، وعطاها للمالي كمقابل ديال 2 برطمات فالسعيدية اللي كان شراهم من عندو وان الطوموبيل كانت هي المقابل باش خلص المالي فهاد البرطمات بجوج، مع العلم ان المالي كايدّعي فواحد المحضر ان الناصيري نصب عليه فـ5 ديال الشقق فالسعيدية وطوموبيل، والناصيري نفى هذا الشي كامل وقال ان المعاملة اللي كانت بيناتهم هي 2 برطمات وعطاه الميرسيدس كمقابل لهم، وان النوطيرة اللي وثقت البيع والشرا بينهم راه كاينة والأمور كانت مضبوطة قانونيا، ولكن المالي والشهود كايبقاو يلعبو بالتواريخ.

سعيد الناصيري، اكد للمحكمة ان المعطيات اللي عندو غاتخرج هذا الملف من الخيال إلى الواقع، وإلتمس المحكمة باش تجيب المالي ولطيفة رأفت وعبد الواحد شوقي ويواجههم قدامها، وقال لها ان التصريحات ديالهم فالمحاضر ديال الضابطة القضائية غير مسؤولة وفيها الكذوب، وانهم كانو كايجيو يقولو داكشي اللي بغاو ويمشيو بحالهم وهو المضرور حيث بسبب الشهادات ديالهم تسلبت منو الحرية ديالو، وتحدى الناصيري المالي قدام المحكمة انه إلى جاب شي دليل يثبت الادعاءات ديالو فهو مستعد لتطبيق حكم الإعدام فحقو.