وكالات//

شافو السكان ديال ولاية فلوريدا الميريكانية واحد المنظر اللي صدمهم بزاف، تمساح كبير كان كيسبح وفـ فمو كلب من نوع “غولدن ريتريفر”.

زاك سبورلوك، واحد من السكان اللي صوّرو التمساح، قال لقناة محلية: “أنا كان عندي كلب، وكنعرف شنو كيعني ليك كيكون جزء من العائلة، وهاد الشي خلاني نحس بزاف بمعاناة الناس اللي ضاع ليهم كلبهم، حيت وقع ليهم أسوأ ما كانو كيتخوفو منو.”

زاك زاد وقال باللي واحد الصديق ديالو كان نبهه، وكان دايز مع ولدو فـ عربة، وقال ليه باللي التمساح كان قريب بزاف، غير بثلاثة مترات، وطولو تقريباً نفس المسافة – يعني حوالي ثلاثة أمتار.

الشهود قالو باللي التمساح تشاف يوم الاثنين، وكان هاز الكلب الميت فـ فمو، قريب من مدرسة ابتدائية وكاع منازل.

اللجنة ديال فلوريدا لحماية الأسماك والحياة البرية (FWC) تفاعلات مع الحادث، وجاو رجال الإطفاء وساعدو فـ اصطياد التمساح وحيدوه من القناة فجنوب شواطئ باتريك.

زاك سبورلوك زاد وقال باللي شاف هاد التمساح بزاف ديال المرات فـ الثلاث سنين اللي فاتو، وراه تْنقل من البلاصة ديالو ثلاث وللا أربع مرات، ولكن دايماً كيرجع لنفس القناة اللي باين باللي كيعجبو الحال فيها.