كود – كازا ///

قال موقع تلفزيون سبتة، أن 850 عامل مغربي ف المدينة باقين مهددين ف أرزاقهم بسباب مأزق بيروقراطي، ويتعلق الأمر بعمال مغاربة كيدخلو يوميا للمدينة باش يصورو طرف ديال الخبز لولادهم.

وأعادت قناة سبتة التذكير بمشكل هاذ العمال المغاربة اللي كيواجهو مشكل إداري كيمنعهم من تجديد الفيزات والكونطرات ديالهم، بسباب رفض مراكز الشرطة المغربية إصدار شهادات الإقامة، مما يترك مئات الأسر ف حالة من عدم اليقين.

وقال مندوب اجتماعي ف سبتة، أن اللي مطلوب من هاذ العمال هو ياخذو شهادة الإقامة (السكنى) المغربية ويديرو ترجمة ليها ويقدموها مع باقي الوثائق إلى المصالح الإدارية الإسبانية لمعالجة تصاريح العمل أو تجديدها، لكن من بداية يناير الحالي، ترفض السلطات المغربية إصدار الوثيقة المذكورة، تاركة المتضررين في مأزق إداري.

وصرح عامل مغربي لـ “إل فارو دي ثيوتا”، أن السلطات المغربية خبراتهم أن هاذ الشهادة كتعطى غير ف حالة إصدار بطاقة الهوية الإلكترونية، وهو ما يجعلهم مهددين  بفقدان طرف الخبز ديالهم ف حالة عدم تقديم الشهادة المذكورة ف ملف تجديد تصريح الإقامة والكونطرات ديال الخدمة.

وتجدر الإشارة إلى وجود حوالي 1000 مغربي ومغربية خدامين ف سبتة ومليلية سوا مع شركات أو الأعمال المنزلية وكلهم مديكلارين ف الضمان الاجتماعي. ودابا كيتمناو تدخل السلطات الوصية ف المغرب باش يبقاو خدامين على راسهم بلا صداع بلا مشاكل.

https://www.ceutatv.com/articulo/politica/solucion-vista-cerca-850-trabajadores-transfronterizos-limbo-burocraticook/20250117184650200033.amp.html