كود ـ هناء أبو علي//
كل عام لانابيك كدير ميزانية كبيرة ديال الفورمسيون. هاذ العملية الهدف منها هو هاذوك الشباب اللي عندهم ديبلومات، يلقاو فرص شغل. هاذ الفورمسيون من المفروض تكون فيها قيمة مضافة وتكون فيها الدقة والعملية.
ما بين داكشي اللي خاص يكون وآش كاين.. فرق كبير. المفروض أن التكوينات تكون عملية، كتعلم الشباب حرفة، أو تحقق ليهم المهننة باش ينتقل من شاب عندو ديبلوم لشاب عندو معرفة عملية وقادر يدماري فشي بوسط.
لسنوات ظلت الاعتمادات المرصودة للتكوين واحد البقرة حلوب ديال لي سونطر دو فرورمسيون، اللي فارقة الكعكة، على حساب الشباب المعطل. هاذ التكوينات فيها واحد العبثية خطيرة وفبعض الأحيان كتعبر على بؤس تدبيري خطير، كيديرو فيها كيفاش باحث عن الشغل يقدم راسو، وكيغلفوها بشي شعارات بحال رفع القدرات التواصلية، وكيفاش يهدر مع المشغل وداكشي ديال الوش.
ملي كان مدير لانابيك من حزب العدالة والتنمية دازو فضائح مسكوت عليها، بحال تكوينات دارت لورش ديال البناية باش ينفخو فالأرقام، واستمرات على هاذ النحو، وكان متوقع أن السكوري يوقف هاذ العبث اللي مازال مستمر.
لانابيك كطاردها تهم ثقيلة حول جدوى تكوين شي شباب باش يخدمو فمناطق التسريع الصناعي، شنو كيقراو فهاذ التكوين، شكون كيدير هاذ التكوين، شكون كيوكلهم فهاذ التكوين، شحال من واحد تدمج مور التكوين، واشنو الفائدة من أنك تكون واحد يخدم فالكابلاج، واشمن فائدة تكون واحد فشي مجالات معندها تا علاقة بسوق الشغل، خصوصا أن هاذ التكوينات كتسالي بعقد إدماج اللي في حد ذاته عقد سطاج لسنتين وليس عقد عمل غير محدد، وبصالير لا يتجاوز السميك مهما كان الدبلوم ومهما كانت طبيعة التكوين يعني الدولة بفلوسها كتأسس لهشاشة التشغيل، علما أن أرقام الادماج فيها نقاش كبير حول المصداقية ديالها، لأن لانابيك كتحسب حتا عاملات النظافة اللي خدمو راسهم وبأجور لا تتجاوز ألف درهم للشهر حتا هيا إدماج فسوق الشغل.
هاذ الشي ديال التكوينات ديال لانابيك واحد العالم كلو أسرار، وفيه بزاف ديال التفاصيل اللي ساكن فيها الشيطان، وفيه أسئلة الأجوبة ديالها كتأدي حتما لإدانة الجهاز الوصي، وتعرضه للمساءلة.
هاذ الثقب الكبير ديال ميزانية التكوينات كيفرض على البرلمان يدير لجنة تقصي الحقائق، أو وزارة المالية تشوف بشحال كيتقام علينا كل شاب كيخدم عن طريق لانابيك. الجواب ديال السؤال كيفسر علاش برنامج أنا مقاول مبلوكي، حيث من المفروض تحبس التكوينات وتصرف كتمويلات لأن فلوس التكوينات المردودية ديالها ضعيفة إلى منعدمة مقارنة مع برنامج أنا مقاول واللي كنت كانت كتشرف عليها المديرة العامة الحالية ديال لانابيك قبل متعين وضور الباربول للتكوينات.
السكوري اللي كيترأس الوزارة الوصية على قطاع التشغيل واللي من موقعو المؤسساتي قادر يفرض تدابير أكثر شفافية وحكامة عوض منبقاو نعطيو الملاير لشركات التكوينات نخصصوها كتمويلات مباشر وبتعاقد صارم.