هناء أبو علي كود//

عاشت وزارة التربية الوطنية تطورات متسارعة في الأيام الأخيرة وتحديدا من نهار الأحد بعدما رفضات النقابات تكلس على طاولة الحوار مع وزارة بنموسى، إذ كان هذا الموقف إيذانا باتخاذ بعض القرارات اللي بلا شك غادا تحرك قضية الإضرابات اللي كيعرفها قطاع التعليم.

من بين هاذ القرارات حسم بنموسى مستقبل محمد بنزرهوني مدير الموارد البشرية، اللي تأكد أنه يتحمل مسؤولية إخراج نظام أساسي لا يحظى بتوافق الشركاء الاجتماعيين.

هاذ المنصب عندو واحد الثقل كبير فالوزارة، وأساسا تدبير العلاقة مع النقابات.

بنموسى اللي قرر يطير بنزرهوني، لاشك أنه باغي يبدا صفحة جديدة مع النقابات، وعلى هاذ الأساس يبدو أن  تعيين محمد أضرضور مدير أكاديمية الرباط لشغل هاذ المنصب خطوة فاتجاه إدارة حوار منتج بوجه مقبول وعارف مفاتيح الحل فالمنظومة، يلا تعطى صلاحيات يمكن تساهم في اختراق وضعية الجمود الحالية في ظل تصلب مواقف الأطراف كافة.

آشنو ممكن يزيد أضرضور لبنموسى فهاذ الظروف العصيبة؟

الناس اللي كتعرف دواليب الوزارة كتقرا هاذ التعيين كمحاولة لإعادة الكرة لملعب الأطراف الفاعلة فالوزارة، بعد اللغط اللي دار على محيط بنموسى ومستشاريه وإقصاء مدراء الأكاديميات من الإسهام في إخراج النظام الأساسي ولو غي بإعطاء رأيهم.

من غير هاذ الشي بنموسى كيراهن على أضرضور باش يدير شي اختراق إيجابي لواحد شارب عقلية ديال التدبير اليومي، وضابط هندسة الحوار مع النقابات، ومدوز محطات صعيبة خلا فيها البصمة ديالو. أضرضور اللي نجح كمستشار ديال لفتيت ف2015 فحل قضية 10 آلاف إطار متدرب يمكن يعاون بنموسى في فك شفرة البلوكاج ديال قطاع التعليم.

هاذ التعيين معناه مرحلة جديدة يمكن تفتح الباب لاقتراحات عملية وتنازلات ضرورية لتجاوز هاذ الاحتقان.

اضرضور كان دوز تجربة ديال تسوية مشكل أساتذة الابتدائي العرضيين اللي تدمجوا بالآلاف فمنتصف الألفية فمنطقة الجنوب، ملي كان نائب ديال الوزارة فزاكورة، وتعطى هامش ديال التحرك والحوار، فعهد الوزير المالكي.

تعزيز محيط بنموسى بواحد من ولاد الدار فصناعة القرار يمكن تعجل بحسم الموقف من النظام الأساسي سواء فاتجاه تسريع مسار التعديل أو التجميد المؤقت وممكن مسار آخر يقدر يساهم فعودة الاستقرار للمنظومة باش ولاد المغاربة يرجعو يقراو بسرعة ويعتقوا الموسم الدراسي من شبح السنة البيضاء.

أضرضور اللي سماوه أساتذة التعاقد فران الوزارة راجل كينقز على الحواجز ملي كتفرضها الضرورة، وذاك الشي علاش ممكن الحوار اللي كتوقع مصادر أنه يكون سريع وبأهداف مرحلية ينفتح على كاع الأطراف اللي كتحتج فالشارع، ويقدر يستوعب التنسيقات على أساس أنه حوار ديال خلية أزمة ماشي حوار مؤسساتي مقيد بضوابط العلاقة مع الشركاء الاجتماعيين، وربما البعض يقول إن بنموسى التقط تساؤلات على تغييب رجالات الوزارة فهاذ المرحلة العصيبة بعدما واحد بحال عبد الوهاب السحيمي تساءل علاش الوزارة تستبعد التنسيقيات من الحوار، مستشهدا، فهاد الصدد، بتجربة الحوار اللي دار لفتيت كممثل للدولة المغربية مع المتعاقدين بحضور أضرضور وشخصيات مدنية بحال صلاح الوديع. حيث أن هاذ المحطات هي اللي تحكمت فهاذ الاختيار، خصوصا تدبير أزمة العرضيين، الأساتذة المتدربين، ومشكل التعاقد اللي مازال مطروح لحد الساعة، وبرز فيها اسم أضرضور في كل المحطات والنقاشات التي رافقت مسار هذا الملف الشائك منذ إخراجه من طرف حكومة بنكيران سنة 2016.

دابا واضح أن الوقت ضد الجميع، وزارة وأساتذة وتلاميذ وأسر، وربما تقييم الموقف فرض اتخاذ قرارات جديدة على ضوء المعطيات اللي كتعرفها الساحة وضرورة التوصل إلى حلول مستعجلة لتجاوز هاذ الوضع اللي كيشوش على إيقاع التدبيري اليومي ديال البلاد.