كود ـ كازا//

كردعات وزارة التعليم العالي والبحث العلمي والابتكار، العميدة بالنيابة لكلية الطب والصيدلة ديال الدار البيضاء، البارح بالليل، أي في ليلة الجمعة، حيث علنات الوزارة على الترشيح لمنصب عميد الكلية، الموجه إلى عموم الأساتذة تاع التعليم العالي باش يترشحو لمنصب عميد كلية الطب والصيدلة.

المتتبعين اللي كانوا تيتسناو النائبة باش تشد المنصب رسميا وتولي عميدة، بعد ما شدات لانتيريم على العميد السابق اللي عينو ميراوي في دجنبر 2022 رئيسا لجامعة السلطان مولاي سليمان ببني ملال، تفاجؤوا بهاد التكرديعة، خصوصا أن السيدة كانت تتعتاقد بلي داكشي تاع المناصفة غاد يرقيها أوتوماتيكيا، علاش لا وهي العميدة الفعلية منذ عامين، تتعمل على تصريف أعمال هاد الكلية اللي تتضم أيضا مركز طب الأسنان وغيرو.

المهم الترشيحات دابا مفتوحة للعموم، والمتتبعين تيتساءلوا علاش تصرفات الوزارة والمسؤولين مع هاد السيدة بهاد الشكل.

شي مراقبين تيقولو بلي السيدة واخا شدات منصب عميدة مؤقتا، مقدراتش تكون في مستوى المسؤولية، وتراكمات عليها مشاكل مواجهاتهاش بالحنكة والتبصر، ومبيناتش فيها حنت إيديها.

وضمن هاد المشاكل طبعا احتجاجات الطلبة، والبروفيسورات الأشباح، والانتقادات التي كتوجه ليها وزادت تعيين بروفيسور متقاعد وممدد له وهو موظف شبح في المستشفى الجامعي رئيس لجان الامتحان، والمشاكل التي عرفتها مصلحة طب الأسنان، والانتقادات الكبيرة أيضا في الترقيات والتستر على الفساد وغيرها من المشاكل اللي بانت فيها ضعيفة، ومقدراتش تتواصل ولا تتدخل بشكل يظهر قوة الإدارة والحنكة تاعها في تدبير شأن الكلية.

دابا حتى دوك اللي كانوا مطمعينها وتيعطيوها الفتاوى، تخلاو عليها، منين خرج هاد الإعلان وفرش كلشي.

دابا ملفات الترشيح غتبدا تسحب من قبل الراغبين في شغل المنصب من نهار 22 في هاد الشهر تاع يوليوز، ولمدة خمسة أيام حيث نهار 26 منو، غادي يتسد باب الترشيح على الساعة الربعة والنصف.