كود -سبتة//

كشف تقرير صاوبو المركز الوطني للهجرة والحدود (CENIF) للقاضية ماريا تاردون فالمحكمة الوطنية على تفاصيل جديدة كتعلق بالنشاط ديال شبكات تهريب الحراگة.

ووضح التقرير بلي ما بين 30 يوليوز و19 غشت، سجل المركز وصول على الأقل 148 حراگ من مدينة سبتة لقادس ومالقة فوق 29 زودياگ، وطلع هاد العدد لـ150 حراگ فآخر ميزاجور للبيانات نهار 24 غشت لي فات قبل ما يصيفطو الملف للقضاء.

وحسب النتائج ديال التحقيق، المنظمات الإجرامية اللي متخصصة فالاتجار بالبشر، ما كانتش عندها القدرة باش اخطط وتنظم بشكل مباشر لهاد الموجة وإنما استغلات الوضع باش يربحو فلوس كحلة.

التقرير قال إن الثمن ديال الرحلة وصل لـ 5000 يورو للواحد، وهاد الثمن كيتعتبر قل بزباف من ثمن الحريگ من المغرب لإسبانيا، واللي كانت كتوصل شحال هادي ما بين 12,000 و20,000 يورو للحراگ.

كتعتمد هاد الشبكات الإجرامية على بنية تحتية كاينة فالسواحل المغربية والإسبانية بجوج، وفيها ديور ونقاط ديال التلاقي وبلايص فين كايشريو ويخزنو المواطر والفانتومات والمازوط، عاد لي كايستقبلو الحراگة فمدن بحال قادس، الجزيرة الخضراء، طريفة، واستيبونا، كايقددًر مركز CENIF بلي الشبكات الإجرامية هربات 20,924 حراگ من المغرب لإسبانيا ما بين يناير 2024 وغشت 2026.