عمر المزين – كود////

أفادت المندوبية السامية للتخطيط أن الرقم الاستدلالي للأثمان عند الاستهلاك سجّل فشهر دجنبر 2025 انخفاض بـ1,0% مقارنة مع شهر نونبر، وهاد التراجع جا نتيجة انخفاض الرقم الاستدلالي للمواد الغذائية بـ0,3%، فحين المواد غير الغذائية بقات مستقرة بلا تغيير.

وحسب نفس التقرير، فالانخفاض اللي تسجّل فالمواد الغذائية ما بين نونبر ودجنبر 2025 همّ بالخصوص أثمان الزيوت والدهنيات بـ3,9%، والفواكه بـ8,2%، واللحوم بـ1,2%.

وفالمقابل، عرفات بعض المواد الأخرى ارتفاع فالأثمنة، بحال السمك وفواكه البحر بـ3,3%، والخضر بـ2,8%، والحليب والجبن والبيض بـ0,6%، والقهوة والشاي والكاكاو بـ0,4%. أما فالمواد غير الغذائية، فالانخفاض همّ أساساً أثمان المحروقات بنسبة 0,5%.

وفنفس السياق، وضحات المندوبية أن مؤشر التضخم الأساسي، اللي كيتحسب بلا المواد اللي عندها أثمان محددة وبلا المواد اللي كتعرف تقلبات كبيرة، عرف فدجنبر 2025 انخفاض بـ0,2% مقارنة مع الشهر اللي قبلو.

وعلى المستوى السنوي، بيّنات معطيات المندوبية أن سنة 2025 عرفات ارتفاع فمتوسط الرقم الاستدلالي للأثمان عند الاستهلاك بـ0,8% مقارنة مع سنة 2024، وهاد الزيادة جاية من ارتفاع المواد الغذائية بـ0,8%، وارتفاع المواد غير الغذائية بـ0,5%.

وتراوحات نسب التغير داخل المواد غير الغذائية ما بين انخفاض بـ2,6% فالنقل، وارتفاع بـ3,3% فالمطاعم والفنادق. وعلى هاد الأساس، حتى مؤشر التضخم الأساسي السنوي عرف هو الآخر ارتفاع بـ0,8% خلال 2025 مقارنة مع 2024.

وعلى مستوى المدن، بان تفاوت كبير فارتفاع الأسعار، حيث تصدّرات مدينة فاس المدن فغلاء المعيشة بنسبة ارتفاع وصلات لـ1,7% فالرقم الاستدلالي للأثمان عند الاستهلاك، وولات هي المدينة الأكثر تضرراً من ارتفاع الأسعار خلال سنة 2025.

وجات من وراها القنيطرة بـ1,3%، وكلميم بـ1,2%، وسطات بـ1,1%، وتطوان بـ1,0%، ثم الرباط والرشيدية بـ0,9%، وأكادير وطنجة بـ0,8%، والدار البيضاء بـ0,7%، بينما تسجّلات نسب أقل فـ مكناس والداخلة والحسيمة بـ 0,5%، وبني ملال بـ0,4%، ومراكش بـ0,2%.