أميمة ـ كود ـ كازا//

كشف تقرير جديد صادر عن شركة الاستشارات العالمية Knight Frank ضمن “التقرير العالمي للثروة 2026”، على تسجيل ارتفاع كبير فعدد صحاب العاقة والفلوس بزاف فـالمغرب فهاد السنوات لاخرا.

وحسب المعطيات اللي جا بها التقرير، وصل عدد صحاب لفلوس ولي لباس عليهم. فالمغرب لـ432 شخص فـ2026، بعدما كان لعدد غير 305 فـ2021، وهو ما كيعكس نمو بنسبة 41,6% فمدة 5 سنين.

التقرير ما وقفش هنا، ولكن توقع استمرار هاد الارتفاع، حيت يقدر يوصل عدد الأثرياء والملعقين ديال بصح لـحوالي 550 شخص فـ2031، بزيادة إضافية كتقارب 27,3% مقارنة مع 2026.

وفالعالم، التقرير أكد أن الثروة مازال متركزة فمناطق محدودة، بحيث كاتتصدر أمريكا الشمالية بنسبة 37% من إجمالي الأثرياء فـ2026، ومن المتوقع توصل لـ43% فـ2031.

من جهة أخرى، منطقة آسيا-المحيط الهادئ كاتمثل حوالي 31% من هاد الفئة، مع توقع ارتفاع العدد من 219.310 لـ272.530 شخص فالفترة نفسها، بينما أوروبا كاتجي فالمركز الثالث بـ183.953 شخص، أي اكتر من ربع ديال هاد العدد العالمي.

التقرير حتا هو بين تفاوت كبير بين الدول، حيت الأرجنتين كانت من أكثر الدول نمواً بين 2021 و2026 بنسبة 34%، وطلع العدد من 1.160 لـ1.554 شخص، مع توقع يوصل لـ1.772 فـ2031.

أستراليا حتى هي سجلت نمو بنسبة 32,5%، بحيث ارتفع عدد صحاب العاقة فيها من 12.424 لـ16.460 شخص، مع توقع يوصل لـ26.095 فـ2031.

وفمنطقة الشرق الأوسط وشمال إفريقيا، مصر عرفت نمو طفيف، طلع العدد من 802 فـ2021 لـ822 فـ2026، مع توقع يوصل لـ977 فـ2031.

ولكن فالأخير لي فركعات ليا العالم هي إسرائيل لي سجلت ارتفاع كبير بزاف، وصل العدد من 3.186 لـ5.462 شخص خلال 5 سنين، بنسبة نمو وصلت لـ71,4%.

وفالخلاصة، التقرير كيبين أن عدد الأثرياء فالعالم كيزيد بشكل مستمر، ولكن بوتيرة مختلفة بين الدول.