كود -سبتة//

كشف تقرير صحافي من مدينة سبتة أن الوضع الإنساني ديال المهاجرين، خصوصاً القاصرين، وحسب شهادات بزاف ديال الأطفال كيعانيو من الجوع، الخوف، الضرب، والنعاس فالزنقة، وسط الأزبال والمناطق الصناعية، بلا حماية .

التقرير ديال إل موندو كيعاود على كنزة، بنت عندها 15 عام جات من فاس، قالت باللي تضربات بحجرة فراسها ملي وصلات لسبتة، وخا أنها مشات للسبيطار ما تلقاتش العلاج، أما ريدا، بنت من تطوان عندها 12 عام، قالت بلي دازت أيام طويلة بلا ما تلقى ما تاكل، وتجرحات فركبتها وصبعها بعدما وقعو مشاكل فحي برينسيبي.

واحد الشاب مغربي عاود للجريدة أن الأطفال تعرضو للمطاردة والتهديد حتى بجناوا، كيف ما قال إن واحد من صحابو تضرب بالموس ومن بعد، رجعوه البوليس لهونجار مهجور بمنطقة تاراخال، اللي ولا كيشبه لحي عشوائي كينعسو فيه مئات الأطفال وسط الزبل والخرب.

التقرير ديال إل موندو نقل شهادات خطيرة على تعرض بعض القاصرات لاعتداءات جنسية، واحد السبتاوي مغربي قال إن بنات صغار تعرضو للاغتصاب فحي برينسيبي، كيف ما أكد أب من نفس الحي أن بعض القاصرات لقاو راسهم مظطرين يمارسو الجنس مقابل الفلوس أو المباتة والتخبية.

واحد المتطوعة كتفرق الماكلة قالت بلي شافت بعينيها بنات صغار بزاف كيمارسو الدعارة، وحاولات ترجعهم للحدود، ولكن مبغاوش، هاد الشهادات كتشير، حسب التقرير، بلي كاين استغلال جنسي خطير وسط قاصرين لي ما عندهم حتى حماية.

عدد كبير من الحراگة الصغار كانو كيتخباو وسط المقبرة الإسلامية فسبتة باش يتبردو ويشربو الما، قبل ما يقطعوه عليهم.

فمنطقة سيدي مبارك، كاينين صفوفة طوال ديال القاصرين والكبار باش ياخدو الماكلة من متطوعي الهلال الأحمر، كما رصد التقرير أن الجيش الإسباني رجع صحة بعض القاصرين بالعصا للمغرب وخا أنهم ما بغوش يرجعو.

من جهتها، طالبت حركة سومار، الشريك الحكومي، باحترام القانون، وعدم ترحيل القاصرين أو الأشخاص اللي عندهم الحق يطلبو اللجوء، وخا هكاك رصدات الجريدة صباح الثلاثاء مجموعات من الأطفال غاديين بهم عناصر الشرطة ومؤسسة سامو لمعبر تاراخال فالطريق للمغرب، وهي إجراءات اعتبرها رئيس اللجنة الإسبانية لمساعدة اللاجئين خارجة على البروتوكول القانوني.

وختم التقرير، أن خطاب الحكومة على احترام حقوق الإنسان، كيختلف على الواقع اللي كينقلوه الشهود والصور من الميدان.