كود- كازا//

ناضت قربالة فجلسة اليوم الجمعة بغرفة الجنايات الابتدائية بمحكمة الاستئناف بالدار البيضاء، خلال محاكمة سعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة، المتابع في قضية ما يعرف بـ”إسكوبار الصحرا”، لدرجة أن رئيس المحكمة قرر يرفعها حتى تكالما الأمور.

وملي عطى القاضي على الطرشي الكلمة للوكيل العام، باش يبدا يسول سعيد الناصيري، وملي طرح عليه أسئلة بخصوص الفيلا وتاريخ الاستلام ديالو لها وإمتى دخل لها وبدا هو كايجاوب على الأسئلة، تدخل بعدها دفاع المتهم وبدا كايحتج بقوة على أسئلة الوكيل العام.

دفاع سعيد الناصيري احتج بداعي أن هذه الإسئلة اللي كايطرح  الوكيل العام على موكلهم ديجا تطرحت عليه من قبل المحكمة وجاوب عليها، وكان الاحتجاج ديالهم قوي، وكان شنأن بينهم وبين الوكيل العام، بسبب الأسئلة اللي رفضوها.

رئيس الجلسة تدخل وقال للمحامين ديال سعيد الناصيري، واش الدفاع خايف من الوصول للحقيقة؟ وجاوبوه وقالو له: “حنا ما خايفينش من الوصول للحقيقة.. النيابة العامة ما خاصهاش تقول لينا ااااسي الدفاع ونذكر المحكمة أن المنشور الملكي يقتضي أن المحامي يتقال له الأستاذ”.

واضطر بعدها رئيس المحكمة علي الطرشي إلى رفع الجلسة بسبب الأجواء اللي كاينة، والاحتجاج القوي ديال محامين ودفاع سعيد الناصيري، حتى تهدأ الأجواء.