فاطنة لويزا ـ كود//
هادشي لي طاري هاد الأيام في البلاد زوين ومزيان. وأهم حاجة فيه أنه كيفضح بنادم لي عندو زوج وجوه.
باش نتفاهمو، الشباب لي كيحتج راه ماشي دليل كافي باش نتسرعو، ونقولو بلي راه الشباب كيهتم بالسياسة، غير عندو مشكل مع الأحزاب والمؤسسات.
العكس، راه عدد الشباب لي كيشارك فهاد الاحتجاجات دليل على أنه بالفعل الشباب معندوش مع السياسة، حيت أغلب الشباب مكيشاركش في الاحتجاجات.
إو يمكن الأغلبية ديال الشباب معندها ثقة لا في أحزاب، ولا في مؤسسات، ولا حتى فهاد الاحتجاجات براسها.
حيت فالأيام الأخيرة فاش توقفات التدخلات ديال القوات العمومية في فض الوقفات، بان الحجم الحقيقي ديال المحتجين.
وهادا مكيعنيش أنني ضدهم.
ميمكنش لواحدة بحالي مع الحقوق والحريات تكون ضد الاحتجاج السلمي.
غير هو ما خاصناش نبالغو، ونتكلمو على انتفاضة الشباب.
مازال بعاد على هاد اللحظة.
اليوم الخميس كنت حاضرة معهم في كازا، ديك الشي قليل إلى متوسط، في حدود الربع ديال ساحة مارشال. وهادشي في مدينة مليونية.
مغنقولش بلي مكاينش إيجابيات في تحركهم.
كاين شلا إيجابيات.
بحال انفتاح الإعلام العمومي، على النقاش العمومي لي خاص يكون، واخا كان شوية ديال المزايدات والشعبوية، ولكن هادا حال بلاتوهات الحوارات السياسية في العالم كلو حاليا.
ومن الإيجابيات كذلك أنها أظهرت مرة ثانية للعالم، بلي المغرب دولة عندها استقرار سياسي، بحيث أنه من جهة كاين إجماع على المؤسسة الملكية، لي حتى الشباب اعتبروها خط أحمر، ومن جهة فالمؤسسات نعمل بشكل عادي.
الحكومة مستمرة في عملها، ما كاين لا إضرابات، لا توقف ديال الدراسة، الأسواق تشتغل بشكل عادي، كل القطاعات العمومية والخاصة حتى هي خدامة بالروتين اليومي ديالها.
الاحتجاجات كاينة في مدن محدودة، وخارج أوقات العمل والدراسة، ولا تعطل حتى حركة المرور.
أنا باغية ندوي على إيجابية أخرى، وهي ان هاد الاحتجاجات كشفت نفاق بعض الأحزاب.
وماشي بالضرورة أحزاب المعارضة.
عادي أن أحزاب المعارضة تبغي تركب على الاحتجاجات، باش تماركي البيوتا على الحكومة. واخا واحد نبيلة منيب سمعات ما لا يرضيها فاش مشات عند الشباب تحتج حتى هي.
النفاق هو لي بينوه زوج أحزاب من الأغلبية الحكومية. وكنقصد البام والاستقلال.
التجمع الوطني للأحرار على الأقل تحمل المسؤولية ديالو فهاد أربع سنين ديال تدبير الشأن العام.
سبقلي انتقدت عزيز اخنوش ، وسبقلي كتبت بلي أنه كاين تأخر في إعطاء جواب على الاحتجاجات، خصوصا أن من الشعارات التي ترفعها رحيل الحكومة الحالية.
وسبقلي كتبت على ضعف التواصل عند هاد الحكومة.
ولكن الموضوعية كتقتضي نقول أنه الحزب الوحيد لي تحمل المسؤولية ديالو.
الوزراء ديالو قالو بلي كانت أخطاء في التدبير، وقالو بلي أنهم متفقين مع الشباب في المطالب لي رفعوها، ووزير الصحة خرج زوج خرجات كان موفق فيها.
خرج مع لجنة برلمانية، وبقا معاهوم حتى لوقت متأخر من الليل، ومكانش عندو مشكل يتم بث ذلك اللقاء مباشرة، ويسمح فيه بحضور الصحافة.
والخرجة الثانية كانت في دوزيم، وكانت ريمونتادا حقيقية.
كان صريح مع المواطنين في ما يخص الحالة الكارثية ديال المستشفيات.
وكان مقنع في تقديم ما تم القيام به لحد الساعة من أجل إصلاح الكوارث لي تراكمات لسنوات.
وعطا أمل في المستقبل ملي قدم المشاريع لي انطلقات وفين وصلات نسبة الإنجاز.
والكاو، هو أنه عطا انطلاقة ديال أوديت ديال ثلاث سنوات الأخيرة في كل القطاعات المرتبطة بالصحة: المديريات، المستشفيات، الأدوية، الصفقات، وكلشي.
وأن نتائج الأوديت غيوضعها رهن إشارة النيابة العامة لاتخاذ اللازم.
غير هادي، باراكا باش نقولو برافو الشباب لي حركتو هاد البركة، وبرافو الوزير بهاد سرعة الاستجابة ولي كتبين الإحساس بالمسؤولية والكفاءة.
في انتظار شي حاجة مشابهة يديرها سي سعد برادة في قطاع التعليم.
في المقابل، صحاب التراكتور، غير بدات الاحتجاجات، وهوما يقولو للحكومة لي هوما جزء منها، وعندهوم فيها وزارات وازنة: التعمير/ التشغيل/ التواصل والثقافة/ التعليم العالي/ الطاقة والمعادن، قالو ليها: إذهب أنت وربك فقاتلا، إنا هاهنا متآمرون.
وسي نوغمال، أصلا التراكتور بطيئ الحركة، ولي كيسوقو ما يحتاجش يكون عندو البيرمي. وعندو رويضة ناقصة.
فاطمة الزهراء المنصوري، غير سالات من اجتماع الأغلبية لي صدر بيان فيه التضامن الحكومي، مشات كتجري لاجتماع مع شبيبة الحزب، وبدلات كاع الخطاب ديالها، ولات جذرية بحال شي قاعدية من التسعينات.
ديك اللعبة ديال: قلوبنا مع علي وسيوفنا مع بني أمية.
ولكن هاد القفوزية كلها تسالات ليها مع ساكنة بين القشالي في مراكش، ومتضرري زلزال الحوز، لي عطاوها رسالة واضحة: بلا ما تدوخي علينا، ودخول الحمام ماشي بحال خروجو.
السي المهدي بن سعيد بغا يخدم مطور، عيط لبودكاستر مشارك في الاحتجاجات، وسبق التوقيف ديالو، وطلب منو يدير معه حوار.
ديك اللعيبة ديال: أنا معكم ماشي مع لوخرين.
ونسا كاع ديك الشي لي كان كيقول على دعم الصحافة المهنية.
فبلاصة ما يخرج في موقع مهني قانوني، فضل يمشي لبودكاست.
لكن لي فراس الجمل فراس الجمالة، البودكاستر لعب معاه التنس.
فين ماكان بنسعيد ميبغي يتنصل من المسؤولية كيحرجو لاخور.
حيت إذا كان حمزة الفضيل جارى الوزير، وصبغو، كان غيعلن الوفاة ديالو في عالم البودكاست.
لذلك فضل أنه يخدم على ليماج ديالو كشاب عندو مصداقية، على أنه يقدم كادو للوزير لي بغا يهرب من السفينة حيت سحابليه كتغرق.
معنديش مشكل انه في الزمن الانتخابي كل حزب ينش على كبالتو، واخا يكونو كلهم من الأغلبية أو المعارضة، ولكن في المرحلة لي كان الشارع كيغلي، والتخريب في أكثر من مدينة، والإعلام الدولي المتحامل كيرسم صورة بلد غادي للفوضى،.
في مثل هاد المناخ، كان خاص الالتزام الحكومي يكون اكبر، كان التفكير في المصلحة الوطنية يكون اكبر.
لكن للأسف الخوت فكرو في مصالحهم الانتخابية أولا.
هاد المصالح لي خلات نزار بركة لي كان كيسحابلي ديما بلي خاتر، انه يقول أنا هنا بكاسكيطة الحزب ماشي الحكومة، ونبعو كوسكوس نجوى فهاد الهبال.
ياك أ المرضي، ياكي أللا.
إيوا راه برلمانيي الاستقلال والبا مصوتو بالإجماع على كل مشاريع القوانين لي جات بها الحكومة.
يعني كاسكيطة واحدة، وكيكة واحدة.
موضوعات أخرى
