كود سبور//

تفرش الايفواري ستيفن لوبوي مدرب الحراس السابق للرجاء الرياضي، واللي سنا مع شالكة الالماني باش يخدم معهم ابتداء من الموسم الجاي.

ستيفن لوبوي الايفواري اللي زايد فلالمان، واللي قرر يمشي من الرجاء الرياضي وقال لهم أن أسباب شخصية وعائلية هي اللي ورا قرار الرحيل ديالو عن الفريق، فرشوه شالكة الالماني وعلنو انهم سناو معه باش يخدم فالطاقم التقني ديالهم.

وما صبر ستيفن لوبوي حتى يسالي منافسات كاس العرش مع الرجاء الرياضي، وغير ربح الفريق الاخضر البطولة الاحترافية، قرر يمشي يجري لألمانيا باش سني مع شالكة، ودار السبا بعائلتو، فالوقت اللي الرجا كبرو به ودارو له وداع بطريقة محترفة، ودابا خاص المكتب المديري للنادي برئاسة محمد بودريقة يرد البال مع الطاقم التقني وعلى راسو المدرب الالماني جوزيف زينباور خصوصا وانه كل مرة كتخرج شي هدرة على انه غايمشي.