گود سبور- بني ملال//

كايواجه لاعب برازيلي شاب الاسم ديالو ويفرسون دي أوليفيرا باتيستا، واللي فعمرو 23 عام، مشكل ف مدينة بني ملال، حيث لقى فيها راسو واحل فواحد لوطيل بعدما تلقى دعوة من طرف نادي رجاء بني ملال، وفق ما ذكر محاميه ووكيل الفيفا رينان كويلو كوستا باش يجي لعندهم استعداد لتوقيع عقد معهم ويلعب معهم.

وحسب ما توصلات به “گود” من معلومات، فاللاعب ويفرسون، اللي فايت له لعب مع أندية فلامنگو وأتلتيكو مينيرو فالبرازيل، جا للمغرب يوم 17 غشت الماضي، بدعوة من رجاء بني ملال ومعها تذكرة السفر، واستقبلو مسؤول من الفرقة لي داه لواحد من لوطيلات ديال مدينة بني ملال فين يگلس، ونهار 18 غشت، شارك اللاعب لأول مرة فالتداريب قبل ما يرجعوه لوطيل يوم 20 غشت بلاما يسنيو معه العقد، وأن شي وحدين طلبو منو يرجع فلوس تذكرة السفر.

اللاعب البرازيلي تمحن والحالة ديالو كانت صعيبة، حيث لاكارط بونكيرwise) ) ما كايخدموش بها المحالات تماك فبني ملال، وكياكل غير شي روبا خفاف، وما بقى حد مسوق له ولا باغي يعاونو، وملي بغا يمشي لكازا نهار 11 سبتمبر ما خلاوهش ياخذ الباسبور ديالو، وشرطو عليه يخلص لوطيل فين گالس، مع العلم أن النادي هما اللي سكنوه فلوطيل، وبقى حاصل فلوطيل 21 يوم قبل ما يمشي المحامي ديالو للسفارة البرازيلية بالمغرب، باش يلقاو له شي حل.