سامي العلوي-كود كازا //

في إطار تتبع ضوسي التخلويض ديال ريزو ضرب كريديات بالملايير بوراق مزورة لي  كيتزعمو شخص سميتو “الحاج”، وصلات “كود ” لمعطيات كتتعلق بشبكة كاتنشط للإضرار بالاقتصاد الوطني وهدم الثقة بين المستثمرين والبنوك، أفراد هاد الشبكة اللي كايديرو مشاريع وهمية على الوراق؛ وكايخدو عليهم قروض بملايير السنتيمات او ترهنو للبنك عقارات مزورة.

وفي هذا السياق، قالت مصادر “كود”، إن من بين المشاريع الوهمية اللي تنصب فيها على البنوك الوطنية كاين مشروع “المدرح”، اللي هو عبارة عن إنشاء محطة للتبريد والتلفيف بالحي الصناعي زناتة؛ على مساحة تقدر بـ6000 متر مربع؛ بتمويل بنكي محدد في حوالي 5 ملايير سنتيم ، الشركة مولات المشروع  هي ديال رأس الهرم الملقب بالحاج اللي مقرها بعين السبع؛  ولي فايت ضارب 2 شدات فعكاشة بالتزوير في محررات رسمية، نفس الشركاء اللي فيها هوما الشركاء والمسيرين ديال الشركة اللي غادي تنجز المشروع maitre d’ouvrages  يعني خيرنا مايديه غيرنا.

المصدر نفسه تيقول، بللي أفراد هاد الشبكة كايخدو القرض؛ كايحطو شوية ديال السيمة والرملة وشي آليات متهالكة وشوية ديال الحديد مصدي، وكايبدلو سميات المساهمين والشركاء، وكايجيبو “بارشوك” يعني ضحية اللي مافاهم والو وكايديروه هو المسير ..

مبالغ القروض كاتبخر؛ والمشروع ماكايدارش، والبنكة عند راسها عندها ضمانة ديال الأرض..

ملف الأرض فيلم بوحدو.. غادي نرجعو ليه باش نشرحو شنو علاقتو بشبكة السطو على عقارات الأجانب والتزوير اللي أفرادها فعكاشة..

هاد الملف بدات فيه لونكيط عند الفرقة الوطنية ديال البوليس بشارع الروداني من شهر 9 سنة 2021 وفيه مجموعة من المفاجأت على الشبكة ومدى امتدادها ف الفيلم ديال غسيل الأموال.