وكالات//

شهدات مدينة البندقية فإيطاليا وحدة من أكثر المناسبات الاجتماعية اللي خلقات جدل هاد السيمانة، مع بداية الاحتفالات دالعرس ديال رجل الأعمال الأمريكي جيف بيزوس، مؤسس شركة “أمازون”، والإعلامية لورين سانشيز، واللي جمع نخبة من كبار الشخصيات فمجالات السياسة والفلوس والفن.

رغم السرية اللي كانت محيطة بتفاصيل العرس، بداو بزاف ديال المعلومات كتظهر شوية بشوية، وكتبيّن الضخامة ديالو، سواء من ناحية التكاليف ولا التحضيرات اللوجستية.

التقديرات الرسمية قالت بلي الميزانية ديال الحفل ممكن توصل لحوالي 55 مليون دولار، حسب تصريحات رئيس إقليم فينيتو، لوكا زايا.

الاحتفال الرئيسي متوقع يتدار نهار السبت داخل مجمع “ترسانة” التاريخي فحي كاستيلو، اللي هو مكان قديم كيرجع للقرن 14، ومميز بموقعه المائي المحمي، اللي ما يمكنش توصل ليه برا إلا فاش كيرفعو الجسور اللي دايرين بيه.

هاد الحدث تزامن مع وصول موجة ديال الطيارات الخاصة لمطارات البندقية، تريفيزو وفيرونا، وتقارير قالت بلي على الأقل 90 طيارة غادي تهبط فهاد المنطقة طوال فترة الاحتفال.

وزيد على ذلك، تأمّنوا أكثر من 30 قارب مائي باش يسهلوا على الضيوف التنقل، من بين الضيوف اللي جاو، إيفانكا ترامب وزوجها جاريد كوشنر، اللي وصلوا المدينة جايين من توسكانا.