كود سبور//

تلقات جثة امراة فتيران كارتوخا بمدينة إشبيلية الإسبانية، وهو واحد من الملاعب اللي غايكونو فيها ماتشات كأس العالم 2030، ضمن التنظيم الثلاثي للمغرب مع إسبانيا والبرتغال.

وتعود تفاصيل الحادث، إلى سيدة خدامة فتيران لاكارتوخا، لقاو الجثة ديالها يوم الثلاثاء الماضي فشي باب من أبواب الملعب المذكور، بعدما تقطعت أخبارها يوم الاثنين الماضي، حسب جريدة elmundo الإسبانية.

ووضحت الجريدة نقلا عن مصدر فالبوليس الإسباني، أن الشرطة جاهم اتصال من شخص قالهم أنه لقى سيدة مغيبة فتيران لاكارتوخا، وملي وصلو هما والإسعاف لقاو السيدة ميتة، وداوها يديرو لها التشريح واخا كاتبان أنها وفاة عادية حسب ما قالت الجريدة، اللي كشفت أيضا بناء عن مصادر فوزارة الثقافة والرياضة الإسبانية أن الراحلة كانت خدامة بالأمانة العامة للرياضة وأنها على وشك التقاعد.