وكالات//

علنت أكاديمية فنون وعلوم الصور المتحركة نهار الأربعاء باللي بثّ حفل توزيع جوائز الأوسكار غادي يتحوّل من شبكة ABC لمنصة يوتيوب ابتداءً من عام 2029، من بعد ما كانت ABC هي الناقل الحصري للحفل لعقود طويلة.

وغادي تبقى ABC كتنقل الحفل السنوي حتى لعام 2028، اللي غادي يتزامن مع الاحتفال بالذكرى المئوية ديال الأوسكار، ومن بعد غادي تمشي الحقوق العالمية للبث ليوتيوب حتى لعام 2033.

وغادي تولّي يوتيوب هي المنصة الرئيسية لكل ما عندو علاقة بالأوسكار، بحال تغطية السجادة الحمراء، إعلان الترشيحات، وجوائز الحكّام.

وقال الرئيس التنفيذي ديال الأكاديمية بيل كرامر ورئيسة الأكاديمية لينيت هاول تايلور: “حنا متحمسين بزاف لهاد الشراكة العالمية مع يوتيوب باش تكون هي منصة المستقبل ديال الأوسكار وبرامج الأكاديمية طول العام، وهاد الشي غادي يخلّي الحفل يوصل لأكبر عدد ممكن من الجمهور فالعالم‘‘.

ومن جهتو، قال نيل موهان، الرئيس التنفيذي ديال يوتيوب: ’’جوائز الأوسكار واحد من المؤسسات الثقافية الأساسية ديالنا، وهاد الشراكة مع الأكاديمية غادي تلهم جيل جديد ديال المبدعين ومحبي السينما، مع الحفاظ على الإرث العريق ديال الحفل‘‘.

وكانت شبكة ABC، المملوكة لشركة والت ديزني، هي الناقل الحصري ديال الأوسكار من عام 1961، باستثناء واحد الفترة قصيرة بين 1971 و1975 اللي رجعات فيها NBC للبث. ووصفت ABC فبلاغ ديالها هاد الشراكة الطويلة بأنها “فخر الشبكة لأكثر من نص قرن”.