أحمد الطيب – كود الرباط///

علمت “كود” باللي المديرية العامة للأمن الوطني، عينات صباح اليوم الأحد، عبد الرحمان عفيفي نائب جديد لوالي أمن فاس، وجا للعاصمة العلمية من مدينة بنجرير  للي كان فيها نائب لرئيس المنطقة الإقليمية للأمن ببنكرير.

المديرية العامة للأمن الوطني سبق ليها عفات هاد المسؤول الأمني اللي دبا عندو كراد ديال “والي أمن” أواخر ديال عام 2017 بعدما مشا يدوز شي مباراة ديال القضاء بلا ميخبر الإدارة ديالو، وتقرر باش يتحال على مصالح ولاية أمن مراكش بلا شي مهمة.

النائب الجديد لوالي أمن فاس كان خوا المقر ديال العمل ديالو فداك الوقت ومشا لمدينة أخرى باش يدوز امتحان ديال القضاء بلا ميخبر المصالح المختصة بالمديرية العامة، وتقرر باش يتعفى.

عفيفي كان خدم فعدد من المدن وهو حاصل على الدكتوراه بميزة مشرف جدا وكان ناقشها في موضوع “مسؤولية الدولة في إعمال الحق في التظاهر والاحتجاج السلمي”.