كود سبور//

بداو الوداد الرياضي بتعينهم لعزيز بنعسكر كمدرب مؤقت للفريق مرحلة جديدة، غتعرف بزاف ديال التغييرات فالهيكل ديال الواك، ومن بين هاد التغييرات كاينين عدد من اللاعبين اللي غيمشيو بحالهم، مع تعيين مدرب جديد باش يقود الواك ابتداء من الصيف الجاي، ويشرف على انتداب لاعبين جداد مزيانين وبقيمة الوداد اللي باغي ينافس على الالقاب الموسم الجاي.

وحسب مصادر “گود” فالوداد الرياضي عندهم اتفاق مع الحسين عموتة اللي خدام دابا مع المنتخب الأردني، وباغي يرجع للمغرب يخدم حيث عندو ظروف شخصية، وكيتسناو هما وياه انه يتوصل لاتفاق مع الاتحاد الأردني باش يتفارقو ويرجع للمغرب يشد الواك، وهو اللي اقترح على الوداد تعيين عزيز بنعسكر مدرب مؤقت للفريق الاحمر خلال ما تبقى من هذا الموسم، بينما جا هو فالصيف الجاي يدرب الوداد ويكون بنعسكر مساعد له فالطاقم التقني ديالو.

الوداد وحسب نفس المصادر، داخلين حتى على تغييرات كبيرة وجذرية فالتركيبة البشرية، وعدد من اللاعبين اللي تراجع مستواهم وما بقاوش قادرين يعطيو للفريق غيمشيو بحالهم، ومن بينهم الكابيتان يحيى جبران، ومحمد أوناجم، وإسماعيل الحداد هذا الأخير اللي جا فالميركاتو الشتوي الماضي ولكن ما قدرش يقنع الادارة باش تجدد معه وعدد اللاعبين اللي غيمشيو غيكون كبير، أما اللاعبين اللي فيهم الضو ومستواهم قار غيبقاو ويكونو هما لاباز اللي غيبني عليها المدرب الجديد الجاي الفريق ديال المستقبل، بحال أيوب العملود اللي فتحو معه ادارة الوداد المفاوضات باش يجدد العقد ديالو، مع انتداب لاعبين جداد بعد نهاية هذا الموسم بتوصية من المدرب اللي غيجي واللي وبنسبة كبيرة وحسب نفس المصادر ما غيكونش من غير الحسين عموتة، وهذا الشي استعدادا للموسم الرياضي المقبل اللي غيلعب فيه الوداد على البطولة الاحترافية والسوبر ليگ الإفريقي وكاس العرش وكاس العالم للاندية 2025.