الرئيسية > آش واقع > تعيينات السفراء: شكون انت اهم من واش فيدك. كيفاش كرس بوريطة كراهيتو للمرا واللي عندو باه فالعرس وصحاب نعام سيدي ناصر وضرب صحاب “اللا” وانتاقم منهم
07/07/2020 10:30 آش واقع

تعيينات السفراء: شكون انت اهم من واش فيدك. كيفاش كرس بوريطة كراهيتو للمرا واللي عندو باه فالعرس وصحاب نعام سيدي ناصر وضرب صحاب “اللا” وانتاقم منهم

تعيينات السفراء: شكون انت اهم من واش فيدك. كيفاش كرس بوريطة كراهيتو للمرا واللي عندو باه فالعرس وصحاب نعام سيدي ناصر وضرب صحاب “اللا” وانتاقم منهم

كود هناء ابو علي ///

البارح المجلس الوزاري علن علي تعيينات عدد من السفرا. التعيينات كيف ينص على ذلك الفصل 49 من الدستور جات باقتراح من رئيس الحكومة وبمبادرة من الشؤون الخارجية والتعاون الإفريقي والمغاربة المقيمين بالخارج ورئيس الدولة هو اللي كيعين. حنا عارفين باللي الاقتراح كيعني مع بنعرفة هو فاكتور وصافي. اي هز اللائحة كيف كيقول الدستور٬ وحطها فالديوان الملكي. معاه ممكن نتصورو انو ما شافهاش كاع.

يعني المسؤولية لوزير الخارجية صافي. فهاد التعيينات ديما كيمارس سلطويتو. تعيينات كتكون مقسمة. الغالبية العظمى ديالو وشي اسماء كيجيو من مؤسسات استراتيجية للبلاد.

نشوفو التعيينات اولا اللي عددها 20 سفير وسفيرة مادام الكاتبة العامة للوزارة. وعلى سلامتنا هاد المنصب شحال وهو خاوي من نهار تخلص بوريطة بالقوالب اللي فيه من علي لازرق وعينو سفير فتركيا والسيد راه مازال فالمغرب بعد شي مشاكل مع بلد اردوگان. يعني مازال كينتاقم منو.

بوريطة جاب لهاد المنصب ديال الكاتب العام مرا كتخدم ماشي اكتشافو ولكن دير ليه اللي بغى. تخليه مصور راسو ملك فمملكتو اللي هي وزارة الخارجية.

باقي السفرا هما

2. الحسن ناصري، سفير فالسنغال

3. ادريس اصباين، سفير فمالي

4. زكرياء الكوميري، سفير فتنزانيا المتحدة

5. عبد الرزاق لعسل، سفير فجمهورية كينيا

6. عصام الطيب، سفير فغينيا

7. محمد حمزاوي، فالإمارات

8. علي بنعيسى، سفير فالكويت

9. محمد آيت وعلي، سفير فالجزائر

10. عبد الرحيم موزيان، سفير ببرام الله

11. كريم مدرك، فالسويد

12. محمد الصبيحي، فاليونان

13. حكيم حجوي فالمملكة المتحدة وايرلندا الشمالية

14. نبيلة فريدجي فالنرويج

15. هشام دحان، سفير فالدومينيكان

16. هشام العلوي، سفير فكوبا

17. بشرى القادري بودشيش، سفيرة فجمهورية بنما

18. وسان الزيلاشي، فكومنولث أستراليا

19. محمد رشيد معنينو، سفير فكازاخستان

20. عبد الرحيم الرحالي فالتايلاند.

اول حاجة فهاد التعيينات هي كاين فقط ثلاث نساء وسان ونبيلة وبشرى. الكاتبة العامة ما نحسبوهاش. هادو غاديين يخدمو فدول. يعني تعيينات هاد الوزير كتكرس كرهو للمرأة. كيبين مشاكلو مع النساء. لبلاد كتخدم على المناصفة على تمثيلية اكثر وهو معقداه. فين ما بانت ليه شي كفاءة كيغبرها.

نشوفو شكون هاد النساء. وسان الزيلاشي باها كان موظف سامي مع الدولة وكان توفى فتحطم شي طائرة هادي سنوات. بنت ماشي شي نيفو تخليها تمشي سفيرة لاستراليا. بشرى حتى هي عندها امها فالعرس. بنت الزاوية البودشيشية. من سميتها تبان. الزاوية خاصها ديما نصيبها. راجلها الاستقلالي عبد الغني بوستة كان فالشيلي. المهم. تجمع فيها العائلة والحزب والزاوية.

كاينة نبيلة فريدجي جاية من عالم البيزنيس. كاينة فالباطرونا. رسلوها لدولة قاصحة محتاجة حتى هي للي كيهدر على حقوق الانسان ويدافع على مواضيع حقوقية ماشي البيزنس. مشاكلنا معاهم على البوليساريو ماشي على البيع والشرا

فهاد التعيينات كاينة فئة اخرى فيها التصاحيب وهادوك اللي كيبندرو ليه. مستعدين يبوسو ليه يدو كاع. يتسخرو ليه. هاد النموذج كيمثلو السفير الفاشل والمدير السابق للتواصل الكارثي كريم مدرك. تجمع فيه كاع صفات التملق. فشل فاستراليا باش كان سفير. مقابل اتاي ومخلي البوليساريو محركين. شوفو اش دارت هاد الجبهة فعهدو تعرفو باللي مرحلتو فهاد البلاد فاشلة. باش يزيد يجازيك هاد بوريطة عطاه سفارة المغرب فالسويد. واييه رسلو للسويد. وهو قنصل فشي دولة ماشي مهمة بزاف عليه. هنا كاين البوليساريو. بخطابو التقليدي ما يقدر يقنع حتى لمغاربة باقي غير السويد اللي محركة فيها البوليساريو مزيان. هاد لبلاد خاصاه مرا من شي حزب يساري عندها ثقافة حقوقية وعندها معرفة بالملف ولا كاين نساء قويات من الصحرا كلثوم الخياط او گجمولة بنت ابي. عندهم الانفة ما كيرضاوش. اكيد ما غادينش يحتارمو امثال بوريطة.

فهاد التعينيات كذلك لقاها بوريطة فرصة يهين ويهمش عدد من المدراء. فيهم شي وحدين كانو صحابو وباش ولى كاتب عام بدا يحفر ليهم ودابا باش طلع وزير زاد همشهم. كيشوف فيهم وجهو فلمرايا. حقيقتو. شخصيتو الانتهازية.

شي سفرا قالو ل”كود” باللي هاد السيد غادية تسالي بيه ويمشي من الخارجية. ديك الساعة باش يسافر غادي يحصد تصرفو مع عدد من الديبلوماسيين. فالعادة باش كيكون شي وزير سابق ومسافر كلشي كيرحب بيه فسفارة المغرب فديك لبلاد. مع بوريطة اضاف مصدر “كود”٬ حتى شيفور السفارة ما يرضاش يجي عندو للمطار. هاد الشي باش غادية تلى بيه

موضوعات أخرى