كود الرباط//
التعديل الحكومي أصبح وشيكا وممكن يكون فالأيام القليلة المقبلة، بطبيعة الحال حسب ما تقتضيه أحكام الدستور وأعراف البروتوكول والأجندة ديال سيدنا.
واخا كاين تكتم شديد على الموضوع من قبل رئيس الحكومة عزيز أخنوش وحلفاءه في الأغلبية، فاطمة الزهراء المنصوري عن حزب الأصالة والمعاصرة ونزار بركة فحزب الاستقلال، فهاد الشي مامنعش يكونو تسريبات كاتغذيها التصريحات الأخيرة للناطق باسم الحكومة مصطفى بايتاس في العديد من القنوات الإعلامية وللي خلات الصالونات السياسية فالرباط شاعلة بالأخبار والتكهنات والتحليلات.
وحسب مصادر “كود”، فالتعديل الحكومي أصبح جاهزا والمقترحات بخصوصه قد تم الحسم فيها بين قيادات الأغلبية قبل ما يسافر رئيس الحكومة للمشاركة باسم الملك فالقمة العربية الأخيرة للي تعقدات في البحرين.
نفس المصادر قالت بللي هاد التعديل غا يكون فهاد الأسبوع أو على أبعد تقدير فالأسبوع المقبل، وحسب الأجندة الملكية بطبيعة الحال.
هاد المصادر قالت بللي هاد الإجراء طبيعي بعدما تمكن رئيس الحكومة من “تجديد الثقة” في حكومته بعد امتحان تقديم ومناقشة الحصيلة المرحلية لنصف الولاية الحكومية أمام مجلسي البرلمان.
لكن، تقول المصادر، هناك آجال سياسية وتدبيرية تستوجب الأعراف احترامها وهي آجال اجتماع اللجان بين- وزارية لإعداد مسودة مشروع القانون المالي لـ2025 وللي من المفترض كتجتامع فشهر يونيو من كل سنة. فإلى كان غادي يتدار تعديل حكومي فمن الطبيعي أن التشكيلة الحكومية الجديدة خاصها تكون جاهزة باش كل وزير يتبع الميزانية الفرعية للقطاع للي غايشرف عليه ويكون على علم مسبق بالمذكرة التوجيهية لرئيس الحكومة فهاد الصدد.
الصالونات السياسية فالرباط ومقرات الأحزاب شاعلة وكتغلي بالأخبار والتكهنات والتسريبات المتعلقة بالتعديل الحكومي.
مصادر أخرى كتقول بللي الهيكلة الحكومية غا يطرا عليها تغيير، حيت هيكلة 2021، تاريخ الانتخابات للي جابت هاد الحكومة، ماشي بالضرورة غا تبقى نفس الهيكلة ف 2024.
وأهم قطاع للي غا يتم إعادة التركيب ديالو هو عودة وزارة الشباب والرياضة وهاد الشي عندو علاقة باستعدادات بلادنا لكأس العالم 2030. الأخبار كتقول بللي مفاجأة غا تكون فالوزير للي غا يتعين على رأس هاد الوزارة، وغالبا غايكون من الشباب والوجوه الجديدة باش تعطا إشارة قوية للشباب وتجديد النخب. إضافة إلى إمكانية يكون تغيير جذري فالوزارات اللي عندها علاقة مباشرة بالتشغيل في ظل الأرقام المخيفة ديال مندوبية التخطيط، بحال قطاعات الصناعة والسياحة والفلاحة والاستثمار. ولكن قبل كل شيء إصلاح الإدارة للي هي أساس الاستثمار.
من جهتها وزارة الصحة والحماية الاجتماعية غا يطرا عليها تغيير ومن المرجح أن قطاع الحماية الاجتماعية للي اصبح قطاع استراتيجي غايتم تأطيرو من قبل وكالة مستقلة، والأخبار المتداولة كتقول بللي الوزير خالد أيت الطالب مرشح بقوة لإدارة هاد القطاع الاستراتيجي، وممكن يبقا آيت الطالب وزير الصحة ويتم إلحاق حقيبة الحماية الاجتماعية لقطاع المالية.
من الأخبار المفاجأة أيضآ، للي ممكن يحملها هاد التعديل الحكومي هو إمكانية يكون تغيير على رأس وزارة الداخلية بتعيين الوالي اليعقوبي فبلاصت عبد الوافي لفتيت. هاد التغيير الكبير، إلى تحقق فعلا، فهو إشارة بللي وزارة الداخلية مقبلة على تنفيذ توجيهات فمجال التنمية الترابية وتفعيل الجهوية المتقدمة وإعادة النظر فالقوانين التنظيمية للجماعات والجهات.
من بين الأخبار أيضآ المتداولة إنهاء مهام وزير العدل عبد اللطيف وهبي، واخا رئيس الحكومة متمسك به وباغيه باش يدوزو قوانين مهمة فالبرلمان ولكن كولشي ممكن، وأيضا وزير التعليم العالي والبحث العلمي والابتكار عبد اللطيف الميراوي، ممكن يطير، لأن هاد الوزير لي تبلوكا بمشكل طلبة الطب وخاص لي يعطي نفس جديد ويحل هاد الأزمة.
على هاد الأساس، كيروج فصالونات الرباط، هناك تعيينات غايستافدو منها قياديون فحزب البام وحزب الاستقلال، وخاصة وزراء منتدبون وكتاب دولة.
فهاد الإطار، كتقول مصادر أخرى، بللي كاين حديث عن خلق وزارة منتدبة لدى رئيس الحكومة مكلفة بتفعيل الطابع الرسمي للأمازيغية. هاد الموضوع كان تم الترافع عليه بقوة من قبل نشطاء فالحركة الأمازيغية وكاينة اليوم قناعة لدى عزيز أخنوش وقياديين فالأحرار بالأهمية والموضوعية ديال المقترح وخاصة أن التفعيل الرسمي للأمازيغية حاليا شبه متوقف.
على أي، التعديل الحكومي إلى تدار بهاد المواصفات المتداولة حاليا، فغايعطي نفس جديد ودينامية مهمة للمشهد السياسي والحزبي ببلادنا، وللي كيعيش منذ شهور رتابة وفتور.
