كود الرباط//

لا حديث وسط قيادات الأغلبية الحكومية، سوى على التعديل الحكومي المرتقب، واللي تعطل شويا، ولكن حسب مصدر قيادي في حزب رئيس الحكومة هضر مع “كود”، فإنه فعلا كاينا خدمة كبيرة باش يكون تعديل حكومي موسع.

المصدر الحزبي لي هضر مع “كود” ماخباش القلق الكبير لي عند رئيس الحكومة تجاه عدد من الوزراء “الكسلاء” لي لسانهم في بعض الأحيان طويل من فعالهم، خدمة ناقصا وعدم التفاعل مع القضايا والإشكالات لي كيعاني منها عدد من القطاعات.

تقريبا 8 قطاعات حكومية كتعرف مشاكل واختلالات وضعف فالتدبير والتسيير من لدن الوزراء لي شادينها، إضافة إلى أن الوقت بغات دفعة جديدة للعمل الحكومي والسياسي فالمغرب.

هاد الوزراء الكسلاء، حسب مصدر من الأغلبية لي هضر مع “كود”، في مقدمتهم يونس السكوري، وزير الإدماج الاقتصادي والمقاولة الصغرى والتشغيل والكفاءات، لي كيعرف مزيان للغة الخشب. الهضرة الكثيرة  10 لزيرو.

من الوزراء الضعاف بزاف فالخدمة، وزيرة الأسرة والتضامن، الاستقلالية عواطف حيار لي من بدية الحكومة وهي طيح فالفضايح فاش جابت راجلها للديوان باش يتحكم فكولشي.

فالمقابل كيتعتبر عبد اللطيف وهبي، وزير العدل، أكثر الوزراء لي خدم مزيان ، وخدمتو كتعجب رئيس الحكومة، واخا عندو مشاكل فالحزب ديالو، وغالبا غادي يطيروه الباميين ويجيبو بلاصتو فاطمة الزهراء المنصوري، المرأة الحديدية فحزب التراكتور.

وزراء فالأحرار، فيهم للي بينو على ضعف في الكفاءة والتواصل والتدبير، مهددون بفقدان “الكرسي الوزاري”، منهم لي دار فضايح فبداية الحكومة بحال وزيرة السياحة بالصفقات لي دارت، منهم الناطق الرسمي باسم الحكومي الذي أصبح يهاجم الصحافة في خرجاته الأخيرة بدل التواصل الجيد وكشف الحقائق بخصوص غلاء الأسعار.

نادية فتاح علوي، وزيرة بلا صلاحيات تقريبا، مقدراتش تواجه ملف الأسعار، وغالبا كيعتقها فوزي لقجع بصفتو الوزير المنتدب لدى رئيس الحكومة المكلف بالميزانية، فاش كيحضر للبرلمان ويعطي توضيحات على الملفات الحارقة (دعم المقاصة، غلاء الأسعار..).

شكون يطير وشكون يبقا، التعديل اللي جاي غايجاوب.