ݣود-الرباط//

لجنة الداخلية والجماعات صادقات على تعديل قدّموه أحزاب الأغلبية والفريق الاشتراكي، كيشترط على لوائح ديال المستقلّين اللي ما كيتعداش عمرهم 35 عام يجيبو على الأقل 5% من الناس اللي مسجّلين فلوائح التصويت، باش يستافدو من الفلوس ديال الدولة، و مايبقاش غير الترتيب داخل اللائحة.

هاد القرار جا من بعد ما تصوتات اللجنة على القانون التنظيمي ديال مجلس النواب، بحضور وزير الداخلية عبد الوافي لفتيت. 19 نائب صوّت بـ”نعم”، نائب واحد قال “لا”، و4 مادارو حتى موقف.

الجلسة ديال النقاش والتصويت اللي طالت بزاف ناقشات المادة 23، خصوصا الشروط ديال لوائح الترشيح اللي كيقدموها المستقلين، وكيفاش يتنظمو المعايير باش يكونو عندهم نفس الحظ مع لوائح الأحزاب.

أحزاب الأغلبية شدّدات بأن المترشحين المستقلين خاصّهم يجيّدو برامج انتخابية واضحة و قابلة للتطبيق، وزيد عليها وثيقة بنكية كتبرهن باللي عندهم الفلوس الكافية للحملة ديالهم.

الحكومة قبلات تشرّط بأن اللائحة المستقلة خاصها تجيب 5% من الأصوات باش تستافد من الدعم العمومي، اللي كيكون 75% من المصاريف ديال الحملة، ولكن ماخاصّوش يتجاوز السقف اللي محدد فمرسوم.

النواب قالو هاد التعديل كيضمن تكافؤ الفرص بين المرشحين ديال الأحزاب والمستقلين، وكيخلي الدعم يمشي لناس اللي فعلا خدامين بجد.

وأكّدو حتى على أن الهدف هو التوازن ما بين لوائح الأحزاب ولوائح المستقلين، وبأنّ اللي ماجيبش 5% ماعندوش الحق فالدعم.

فالجانب الآخر، الوزير شدّد بأن المترشح المستقل خاصو يجيب برنامج انتخابي كامل، ووافق أنه خاص حتى المنصة الإلكترونية اللي كيديرو فيها الترشيحات تواكب الناس اللي عندهم إعاقة باش يساهل عليهم يترشحو بحال الجميع.

وزاد الوزير بأن البرامج ديال الشباب اللي غادي يستافدو من الدعم خاصها تكون جدّية وواقعية، ويفرّقو بين الناس اللي فعلا باغين يخدمو والناس اللي غير كيديرو الشو.

القانون كيحدد حتى كيفاش يتصرف الدعم ديال الدولة للمستقلين، والفلوس كتخرج من المبلغ العام اللي كتساهم به الدولة فالحملات ديال الأحزاب.

من جهة أخرى، الوزير رفض اقتراح باش يطلّعو السن ديال الشباب لـ40 عام، وقال بأن الشباب هو 35 عام، واللي فوق هاد السن يقدر يترشح عادي فحزبو.

المجموع العام ديال التعديلات اللي تقدّمو بها النواب هو 164 تعديل:

– العدالة والتنمية: 45 تعديل

– الفريق الاشتراكي: 35

– التقدم والاشتراكية: 19

– الأغلبية: 17

– النائبات غير المنتسبات: فاطمة التامني (23) ونبيلة منيب (19)

وكان نقاش كبير فالمادة 6 ديال موانع الترشح، الحكومة قالت بأنها باغية تحمي العملية الانتخابية، والمعارضة ذكّرت بضرورة احترام قرينة البراءة، وقالو مايمكنش تمنعو شي واحد من الترشح غير حيث لقاوه فالتلبّس بلا حكم نهائي.