الرئيسية > آش واقع > تعتقلو وقطعو الماكلة والزفزافي هزوه للسبيطار وها كيفاش تعاملات معاهم مديرية السجون.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الأول
09/09/2020 13:30 آش واقع

تعتقلو وقطعو الماكلة والزفزافي هزوه للسبيطار وها كيفاش تعاملات معاهم مديرية السجون.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الأول

تعتقلو وقطعو الماكلة والزفزافي هزوه للسبيطار وها كيفاش تعاملات معاهم مديرية السجون.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الأول

عفراء علوي محمدي- كود//

هذ المرة اللخرة اللي حبسو فيها الماكلة 25 يوم مكانتش أول تجربة كيخوضها ناصر الزفزافي وصحابو فالإضراب عن الطعام، حيت سبق ليهم دارو بزاف دالإضرابات وبأشكل مختلفة فالزنازن ديالهم، وهذشي مللي تعتقلو ف 2017 حتى لدابا، خصوصا منهم الزفزافي ونبيل أحمجيق وربيع الأبلق اللي عندهم رصيد وفير فمعركة البطون الفارغة.

وأول مرة يتكلم فيها الزفزافي على الإضراب عن الطعام كانت فواقعة احتجاجو على خطبة الجمعة فجامع ديور المالك فالحسيمة، ف26 ماي 2017، فاش كانت أول محاولة من السلطات لاعتقالو لكن فلت منها، وهكذا هدد ففيديو لايف فأحد الاحتجاجات من بعدها كيقول فيه بأنهم إلى شدوه غادي يدير إضراب عن الطعام، وهكذا تشد من بعد ودارو.

الإضراب على الماكلة بسبب الاعتقال

فاش تشد الزفزافي ف29 ماي 2017 قرر، من الحجرة اللي توقف فيها فمقر الفرقة الوطنية للشرطة القضائية، يدير إضراب عن الطعام مفتوح، وتبعوه مجموعة من المعتقلين لخرين على خلفية الحراك، ومنهم ربيع الأبلق وهو الإضراب اللي تحدد ف3 حتى ل10 أيام عند هؤلاء المعتقلين، على حساب كل واحد وجهدو.

 وف8 فشهر يونيو 2017، قررو معتقلي الحراك يديو إضراب إنذاري ثاني على الطعام لمدة ثلاث أيام، كيف خبرو المحامي ديالهم، وكيتعلق الأمر بكل من الزفزافي، ومحمد جلول، ومحمد محاوي وسليمة الزياني الملقبة ب”سيليا”، وكان السبب هو المطالبة بالسراح. 

ف10 يوليوز 2017، عاوتاني قررو معتقلي الريف فالحسيمة وكازا يديرو إضراب جديد عن الطعام، لكن سرعان ما تراجعو عليه بمجرد ما خرجات المديرية العامة لإدارة السجون وإعادة الإدماج تكذب خوضهم لهذ  الإضراب، وفبلاغ ليها شارت أنه كلهم تناولو وجباتهم بشكل عادي.

 سيليا قطعات الماكلة وتبعوها لخرين

  لكن بالنسبة لسيليا، فقررات ف15 يوليوز 2017 تبدا إضرابها عن الطعام مطالبة من خلالو بالسراح، وخا هذشي تسبب ليها فمشاكل صحية، تبعوها المعتقلين الأخرين اللي علنو إضرابهم ف17 يوليوز فبيان ليهم، وقالو أنهم بغاو لقاء أسرهم سواء طلقاء أو شهداء.

نهار 18 يوليوز، لجنة من مديرية السجون تلاقات بمعتقلي عكاشة من أجل الحوار معاهم ومعرفة مطالبهم التراجع على إضرابهم عن الطعام، واستطعات تقنع سيليا والزفزافي بتعليق إضرابهم بعدما بشراتهم بللي كاين قرار بالعفو عليهم فذكرى عيد العرش، بينما تم نقل المعتقل ربيع الأبلق، فنفس النهار للسبيطار، بسبب مضاعفات إضرابو على الطعام اللي دارو بشكل سري واستمر حتى ل29 يوم، وخلاه يخسر 20 كيلو من الوزن ديالو، قبل ما يقرر حتى هو يعلقو.

الإضراب على الماكلة بسباب موت العتابي

العفو فعيد العرش عام 2017 كان شمل أزيد من 40 معتقل، من بينهم سيليا، وهذشي اللي خلا باقي المعتقلين يفكرو فاستكمال إضرابهم عن الطعام من جديد، لكنهم سرعان ما تراجعو عن هذ القرار حتى استئنفو  اضرابهم عن الطعام الموالي ف8 غشت 2017، بعد وفاة رفيقهم عماد العتابي فمسيرة احتجاجية فالحسيمة اللي عرفات تدخل الأمن، وحددو المعتقلين مدة إضرابهم عن الطعام ف48 ساعة، وفترة حدادهم ل3 أيام.

 ودارت الهضرة على إضراب الزفزافي ورباعتو مور هذشي ف16 غشت، من بعد ما امتنعو من تناول وجبة الغذاء فنفس النهار، وقالو ان هذشي احتجاج ليهم على سوء المعاملة ديال موظفي السجن، داك الساع خرجات مندوبية السجون تاكد ان حتى واحد فيهم ما مضرب على الطعام، وأنهم كيتعاملو معاهم مزيان، لكن تبين من بعد انهم دارو إضراب، وف22 غشت علقوه مجموعة منهم واستمرو فيه مجموعة أخرى، من بعد تدخل المجلس الوطني لحقوق الانسان، وإقناع المعتقلين بتعليقو.  

ف10 شتنبر، كيصرحو المعتقلين للمحامي ديالهم، محمد أغناج، أنهم غيديرو إضراب عن الطعام عوتاني، وكيتعلق الأمر ب31 معتقل، من بينهم بمحمد الأصريحي، وجواد الصابيري، وجمال مونا، ومحمد المجاوي، ومحمد الحاكي، ونبيل أحمجيق، ثم ناصر الزفزافي، بينما المديرية نفات واش واحد فيهم حابس الماكلة، وأنهم كياكلو الوجبات اللي كتقدم لبهم، وحتى الماكلة اللي كيجيبو ليهم عائلاتهم فالقفف.

السجون: المعتقلين وعائلاتهم كيكذبو. وأحمجيق: ماكليتش 45 يوم

وف26 شتنبر، خرجات المندوبية كتنفي وكتقول أن غير 3 معتقلين اللي دايرين الإضراب، وكيتعلق الأمر بكل من نبيل احمجيق اللي بداف ف20 شتنبر كيف صرح ليها، و محمد جرور وربيع الأبلق اللي بداوه يوم 25 شتنبر، وماشي كَاع دوك ال31 معتقل حابسين الماكلة، وهذشي واخا خرجو كياكدو هوما وعائلاتهم للإضراب.

وف24 أكتوبر، خرج أحمجيق ببيان كيقول فيه أنه كمل 45 يوم ديال الإضراب عن الطعام، وعلقو أخيرا تفاعلا مع قرارات الملك بإعفاء وزراء على خلفية ملف الحسيمة، كيف علقوه مجموعة من الرفاق ديالو كانو باديونو معاه فنفس البيريود لنفس السبب.

الإضراب سافط الزفزافي للسبيطار من المحاكمة

وف30 نونبر رجعو المعتقلين يديرو إضراب عن الطعام، احتجاجا على عدم استجابة المؤسسة السجنية لملف مطلبي كانو عطاوه ليها شهراين قبل، ومنهم حتى الزفزافي.

والزفزافي  تأثر بزاف بسبب الإضراب اللي دارو على الما والماكلة، وهزوه للسبيطار فوحدة من جلسات المحاكمة ف5 دجنبر، بسبب وجع حاد جاه فكرشو بعد 6 أيام دالإضراب، وهذشي اللي خلاه وخلا مجموعة من صحابو يعلقو الإضراب من بعد.

موضوعات أخرى

30/09/2020 21:00

الدورة 27 خربقات حسابات المتنافسين على لقب البطولة. الوداد كان أكبر مستفيد منها بعد رجعو فوز عريض للوصافة على بعد نقطة من الرجاء لي تعثر فوجدة