أنس العمري – كود///

تفاعلات النيابة العامة فالمحكمة الابتدائية ديال مراكش بجدية وبسرعة مع القضية ديال الاعتداء اللي وقع للتلميذة “سلمى” من طرف صاحبتها فالمؤسسة، والعودة ديال هاديك اللي اعتدات عليها باش تتشفى فيها وتعاود تهددها، بفيديوهات نشرتهم من بعد ما سالات العقوبة الحبسية ديالها.

وأفاد مصدر قضائي مسؤول أن وكيل الملك فالمحكمة الابتدائية ديال مراكش عطى تعليماتو للشرطة القضائية باش يحلو تحقيق فداك المحتوى اللي فيه سبان للضحية، وتشفّي واضح واستفزاز لمشاعرها، من طرف المعتدية، وقال خاص يتدارو الإجراءات القانونية اللازمة ويتخذو التدابير المناسبة فهذ السياق.

ومن جهة خرى، أكد المصدر أن الحكم اللي كان صدر قبل ضد المتهمة، راعى أنها كانت فداك الوقت قاصر، وتحكمات بشهرين ديال الحبس النافذ وتعويض بـ50 ألف درهم، فالحكم الابتدائي، واللي تأيد حتى فالاستئناف.

ومعلوم أن القضية ديال سلمى ولات قضية رأي عام، بعدما خرجات فتصريحات صادمة لمجموعة ديال المنابر الإعلامية، وعاودات كيفاش مازالت كتعيش المعاناة من بعد الاعتداء، وكيدوزو ليها التهديدات والاستفزازات عبر منشورات وفيديوهات كتنشرهم المعتدية فمواقع التواصل.