كود سبور//

زادو المغرب التطواني فالعقد ديال لاعبهم يوسف الهواري اللي ناعس فالكلينيك، حيث تهرس الويكاند اللي فات ضد الوداد الرياضي فكاس العرش.

ومشاو المكتب المديري للمغرب التطواني الاثنين فالعشية لعند اللاعب يوسف الهواري للكلينيك دارو معه تمديد العقد إلى غاية نهاية الموسم الرياضي القادم 2026، علما ان عقد اللاعب مع النادي كان غايسالي مع يونيو الجاي.

وحسب المغرب التطواني، فتجديد العقد مع اللاعب يوسف الهواري جا من المكتب المديري للنادي لإعطاء اللاعب شحنة معنوية باش يرجع يلعب فوقت قريب، خصوصا و ان الهواري يعتبر من ابناء الفريق و منتوج خالص لمدرسة النادي.

وتعرض يوسف الهواري الى كسر فرجلو ليمنية بعدما دخل بدقايق كبديل فالشوط الثاني ديال ماتش ثمن نهائي كأس العرش مساء السبت الماضي ضد الوداد الرياضي، ودار البارح الاحد عملية جراحية ناجحة بإحدى المصحات الخاصة بتطوان.