محمد سقراط – كود//
بزاف ديال المغربيات وديال النساء فالعالم الى تحطات صورة ديالهم فالأنترنيت لابسات سروال وتيشورط وشعرهم مطلوق وفرحانات وناشطات فباريس قبالت المعلمة السياحية كاباري المولان روج، كان غادي يكون الأمر عادي، وغادي تلقى عندهم تعليقات زوينة وناس كيباركو ليهم التسافيرة، شنو لي كيخلي هاد الأمر فضيحة، هو إلى كانت صاحبة الصورة قيادية إسلامية في حزب شاد السراط المستقيم، وعندو جناع دعوي كاع كينشر الفضيلة والتقوى ويدعو المغربيات للتحجب، ومكانتو وقيمتو فالمجتمع مبنية على المعقول لي مرتابط بالضرورة بالتقوى، هنا كنوليو في فضيحة، ومن حق الصحافة والمجتمع يتعامل معاها كفضيحة لأنها مرتبطة بشخصية عامة وماشي ببنادم من الطرف.
حتى فالعالم “الحر” إلى شي واحد كيدير السياسة وتعرف بشي أفكار معينة وشداتو الكاميرة كيعيش خلاف دوك الأفكار فراها فضيحة، تصويرة ماء العينين بلا حجاب” في حالة كانت ديالها” راه بحال إلى ميشيل أوباما غادي تصور في حفلة ديال كلو كلوكس كلاين، أو بحال ميلانيا ترامب غادي تنظم لجمعية منسا الدولية، العالم وأي واحد غادي يعتابر الأمر فضيحة، والسياسيين فالعالم بفضائح بحال هادي راه كينتهي المسار السياسي ديالهم، راه التعريص الدفاع على إسلامي بدعوى إحترام الحريات الفردية لي هوما أصلا مكيعتارفوش بيها وضدها عقائديا.
وكي العادة فالمغرب فالوقت لي الحداثيين كيدافعو على الحريات الفردية الخوانجية عايشينها طولا وعرضا بصحتهم أسيدي، غي هو يعيشونا معاهم حتى حنا، ماشي هنا يشبعونا بخطاب العفاف والكفاف وهوما يعيشو الحياة بفلوس المناصب لي وصلو ليها غير بسباب هاد الخطاب، ولي غادي يقول أن هاد النقاش تافه ويجب الترفع عنه وناقشو المشاكل الأهم ديال البلاد، راه عندو الحق غي هو راه هادشي فالعالم كامل وراه ترامب وللى رئيس ميريكان غير ببحال إستغلال هاد الفضايح ديال الخصوم ديالو وكاين مكاتب علاقات خاصة فميريكان غير بهادشي وعندها منظرين ومشاهير بحال روجر ستون، هادي هي السياسة ديال هاد العصر وهاكة كتدار، هادشي لي كيخلي من صورة عادية لمرأة فرحانة فضيحة، وهادشي ماشي غير عندنا راه فالعالم كامل تقريبا.
