ݣود//

صدمة قاصحة فالقطاع المصرقفي من بعد قرار البنك المركزي المصري لي فرض فيه خطية كبيرة على البنكة ديال” أبوظبي الأول مصر” ولي قيمتها 959 مليون جنيه (تقريا 21 مليون دولار) البنك المركزي برر القرار بمخالفة المادة 104 من قانون البنوك، لي كتضمن استعمال الكريديات فالأغراض المْخصصة ليها، وبالخصوص تمويلات قصيرة الأجل عطاتها البنكة لشركة “بلتون المالية”، واللي تخلصات كاملة فوقتها.

مصادر مالية قريبة كتقول أن الخطية ممكن تكون عندها دوافع شخصية وسياسية، وسط صراع نفوذ قديم بين محافظ البنك الحالي حسن عبد الله ولي قبل منو طارق عامر. الملف زاد تعقد حيث الرئيسة التنفيذية لشركة “بلتون” هي داليا خورشيد، وزيرة الاستثمار السابقة ومرت طارق عامر، وهاد الشي خلا بعض الناس يشوفو الغرامة كنوع من “تصفية الحسابات”.

المصادر شددات أن العقوبة خرجات بلا تحقيق مسبق وبلا إشعار رسمي بالمخالفة، هادشي لي دفع البنك يطالب بمراجعة قانونية كاملة، هادشي دار صداع وسط القطاع المصرفي وهدد ثقة المستثمرين فالسوق المصري، خصوصاً فواحد الوقت اللي مصر باغا تجيب استثمارات جديدة باش دعم خططها التنموية