وكالات//

أكدات النجمة الأمريكية جينيفر لوبيز بأنها عمرها ما حست بالحب الحقيقي، رغم الشائعات اللي كتقول باللي رجعات لراجلها السابق، الممثل بن أفليك.

هاد التصريح جا منها ملي دارت ظهور فبرنامج The Howard Stern Show نهار 15 أكتوبر، حيث هضرات على العلاقات اللي دازت منها، وذكرت الطلاق الأخير ديالها من أفليك.

و ملي سْولها هوارد ستيرن، اللي عندو 71 عام، واش فشي نهار حسات بالحب الحقيقي، سكتات شوية و جاوبات: “لا”، وزادت قالت: “رغم أنني كنت كنحب الناس بزاف، ما لقيتش اللي يبادلني نفس الإحساس… عطاوني كلشي اللي قدرو عليه، ولكن ما كانوش قادرين يحبّوني حب حقيقي”. وعللات السبب بأنها كانت ما كتقدرش راسها فداك الوقت: “ما كنتش كنبغي راسي”.

جينيفر تزوجات 4 دالمرات، وعندها جوج توائم عندهم دابا 17 عام: ماكس وإيمي، من المغني مارك أنتوني. وآخر زواج وطلاق كان مع بن أفليك، اللي خدم معاها فإنتاج آخر فيلم ديالها “قبلة المرأة العنكبوتية”.

وقالت جينيفر بأن الطلاق الأخير كان نقطة تحوّل زوينة فحياتها: “كان أحسن حاجة وقعات لي، حيث خلّاتني نبدى رحلة حقيقية باش نعرف راسي”، وزادت: “الأساس هو أنت، ماشي شي حد آخر”.