وكالات//

كشفات الممثلة الميريكانية بروك شيلدز فواحد الفيلم الوثائقي سميتو «Pretty Baby: Brooke Shields» لي تطلق أول مرة ف “مهرجان سندانس السينمائي”، أنها تعرضات للاغتصاب فبداية المسيرة الفنية ديالها ف هوليود.

شيلدز ما بغاتش تكشف شكون هو هاد الشخص لي اعتدى عليها، ولكن اشارت غير أن اللقاء لي جمعها بيه كان مع رجل كتعرفو من قبل، وهادشي وقع غير شوية من بعد ما كملات قرايتها ف الجامعة.

شيلدز كانت كتحساب ليها بلي هاد اللقاء كان اجتماع عمل باش يناقشو المشاركة ديالها ف تجارب أداء لفيلم جديد. داها هاد السيد للفندق لي كان نازل فيه، وقالت بلي ادعى أنه بغا يعيط ليها على طاكسي من الغرفة ديالو. ولكن فبلاصت هادشي، دخل للحمام ومن بعد خرج عريان قبل ما يغتصبها، حسب التصريح ديال شيلدز.

الممثلة قالت ف الفيلم الوثائقي: “كان الأمر بحال شي معركة… كنت خايفة لا نتخنق ولا يوقع ليا شي أذى.”

وتابعات: “ما قاومتش بزاف، كنت خايفة بزاف، وكنت كنظن أن الرفض ديالي ما غيكونش كافي”، وزادت: “قلت لراسي حافظي على حياتك ومن بعد خرجي”.

شرات شيلدز أنها من بعد هادشي عيطات على واحد الصديق ليها كان خدام ف مجال الأمن، ولي أكد ليها أن داكشي لي وقع ليها هو اغتصاب، وجاوباتو هي: “مازال ما استوعبتش هادشي”.