كود هناء ابو علي ///

كيفاش سفيرتنا فمدريد كريمة بنعيش دارت خرجة ديال بصاح فاسبانيا. خرجتها الاعلامية البارح مرحلة اخرى فالازمة المغربية الاسبانية. ازمة غادية وتعقد. هي قالت لوسائل الاعلام الاسبانية بالصبليونة “اللجوء الى اخراج المدعو ابراهيم غالي من إسبانيا بنفس الطريقة التي تم إدخاله إليها لن يزيد الأزمة الا تفاقما”.

تهديد واضح لاسبانيا ردا على تهديدات كثيرة قالها مسؤولين حكوميين اشهرهم وزيرة الدفاع مارگاريطا روبليس. . وظفات لغة ماشي ديبلوماسية. وظفات لغة لدولة كتعرفها مزيان مزيان. كتعرف تاريخها وحاضرها وتعقيداتها السياسية وتنوعها اللغوي…. كانت الصرامة ولقصوحية بلا وقاحة. هنا كانت مختالفة على وزير الخارجية ناصر بوريطة اللي كتبان تصريحاتو مراهقة ناقصها الرزانة.

باش سفيرة استدعتها بلادها للتشاور تقول بوضوح ان “أن الأزمة الدبلوماسية الأخيرة بين مدريد والرباط على خلفية استقبال زعيم الانفصاليين على التراب الاسباني، ابراهيم غالي، بشكل سري وبهوية منتحلة، تعد اختبارا لقياس مدى موثوقية وصدق الخطاب السائد منذ سنوات بشأن حسن الجوار والشراكة الاستراتيجية بين البلدين”.

وباللي هاد الشي كيشكل “اختبارا لاستقلالية القضاء الاسباني “الذي يحظى بثقتنا”، وكذلك لعقلية السلطات الاسبانية في ما إذا كانت تريد أن تختار تعزيز العلاقات مع المغرب أو التعاون مع أعدائه”.

راه مشات بعيد بلا وقاحة. استفزتهم بادب. كانت واضحة باش قالت ليهم “المغرب، وفي ظل الازمة الخطيرة التي يعيشها مع اسبانيا، لا يبحث عن أي مجاملة أو محاباة، بل يطالب فقط باحترام روح الشراكة الاستراتيجية التي تجمعه مع اسبانيا وبتطبيق القانون الاسباني”.

كترد طبعا على طريقة التعامل معها كسفيرة لبلدها. تصرف كان فيه استفزاز وفق ما سبق ان صرح به وزير الخارجية المغربي.

تصريجات كريمة بنعيش البارح نهاية مرحلة فالعلاقات مع الصبليون. صعيب جدا جدا ترجع هي لمدريد واخا العلاقات تتحسن شوية. خطابها حدد لهاد البلد اش خاصو يديرو مع المغرب مستقبلا. هي سالات مرحلة واكيد غادية تبدا مرحلة اخرى. وعلاش اللا وزيرة للخارجية. عندها خصال يخليوها تعوض وبتميز الوزير الحالي اللي عامر عقد.